Saşa Yunisoğlu: Qəbələdə 2 xal itirdik
"Rəvan"ın müdafiəçisi Saşa Yunisoğlu Topaz Premyer Liqasının 14-cü turu çərçivəsində keçirilmiş "Qəbələ" ilə oyundan (1:1) sonra azerisport.az saytının suallarını cavablandırıb.
- Oyun barədə nə deyə bilərsiniz?
- Rəqibi yaxşı analiz etmişdik. Onların güclü və zəif cəhətlərini bilirdik. Pis matç keçirmədik. Son saniyələrdə qol buraxmağımız üzücü oldu. Rəqib ən güclü cəhətindən yararlandı, cinah ötürməsindən sonra qol vurdu. Bizim səhvə yol verməyimiz də həlledici oldu. Amma baş hakimin niyə oyunun əsas vaxtına beş dəqiqə əlavə etdiyini başa düşə bilmədim.
- "Rəvan" iki xal itirdi, ya bir xal qazandı?
- Son saniyələrdə qol buraxırsansa, deməli, xal itirmiş olursan.
- Səfər öncəsi oyundan sonra belə düşünəcəyinizi gözləyirdiniz?
- "Qəbələ" ölkənin ən güclü klublarından biridir. Buna baxmayaraq, biz səfərə qələbə üçün yollanmışdıq, məğlubiyyət barədə düşünmürdük. Təbii ki, belə bir rəqibdən səfərdə bir xal almaq yaxşı nəticədir. Amma oyun göstərdi ki, biz daha artığına nail ola bilərdik.
- "Rəvan"ın son üç turdakı çıxışını ("Neftçi" - 3:2, "Zirə" - 1:0, "Qəbələ" - 1:1) fenomenal adlandırmaq olar?
- "Qəbələ"yə də qalib gəlsəydik, belə adlandırmaq olardı. Amma belə yaxşı nəticə saymaq mümkündür. İndi komandada fərqli atmosfer var. Əvvəlki kimi deyil.
- Son turlarda qazandığınız xallara baxmayaraq, komandanız yenə turnir cədvəlinin sonuncu pilləsindədir...
- Bu vəziyyəti dəyişməyə çalışırıq. Komandanın potensialı üst pillələrə çıxmağımıza imkan verir. Son turlarda yaxşı nəticələr qazanmağa başladığımızı nəzərə alsaq, tezliklə son pilləni tərk edə bilərik.
- Sizi komandaya Bəhmən Həsənov gətirdi və hələ ki, onu bu addımına görə peşman etmirsiniz...
- Bu cür etimada görə ona da, klub rəhbərliyinə də minnətdaram. Açıqlamaq istəmədiyim səbəblərə görə bir ilə yaxın idi futbol oynamırdım. Ümid edirəm ki, baş məşqçinin etimadını doğrultmağa davam edəcəyəm. Komandaya indiki çətin vəziyyətdən çıxmağa kömək etmək istəyirəm.
- "Qəbələ"nin ardından növbəti turda sizi daha bir sabiq klubunuzla - "Bakı" ilə görüş gözləyir...
- Əslində, məni az qala hər turda keçmiş komandalarımdan biri ilə oyun gözləyir (gülür). Amma ciddi olsaq, Qəbələdə məni yaxşı qarşıladılar. Orada unudulmaz illər keçirmişəm. Lakin oyun zamanı xüsusi emosiyalar yox idi. "Bakı"ya qarşı keçirəcəyimiz kubok oyununda da belə olacaq. Bu turnirdə yolumuza davam etmək istəyirik. Ona görə də "Bakı"ya qalib gəlməliyik. Yeri gəlmişkən, bu klubun indiki vəziyyətə düşməsinə çox üzülürəm. Ümid edirəm ki, onların maliyyə çətinlikləri geridə qalacaq və hər şey əvvəlki kimi olacaq.