Qarabağın ÇL macərası davam edir
Bu gün UEFA Çempionlar Liqasında ikinci təsnifat mərhələsinin cavab oyunları keçiriləcək. Azerisport.az xəbər verir ki, Azərbaycanı qitənin ən nüfuzlu klub turnirində bu mövsüm son ölkə çempionu "Qarabağ" təmsil edir.
Ağdam klubu mübarizəyə birbaşa ikinci təsnifat mərhələsindən başlayıb. Bölgə təmsilçisinin startdakı rəqibi Malta "Valletta"sıdı. "Qarabağ"ın rəqibi Maltanın paytaxtı Valletta şəhərini təmsil edir. Malta Super Liqasında çıxış edən bu klub 1904-cü ildə yaradılıb. Adalılar oyunlarını 17800 azarkeş tutumu olan "Ta Qali" stadionunda keçirirlər. Ağdam klubunun rəqibi 22 dəfə ölkə çempionu olmaqla yanaşı, 13 dəfə də Malta kubokunu başı üzərinə qaldırıb.
"Valletta" Maltanın avrokuboklarda ən böyük təcrübəyə malik klubu sayıla bilər. Bu komanda bütövlükdə 78 avrokubok matçına çıxıb. Onların yalnız 10-da qələbəyə sevinən maltalılar 12 görüşdə də heç-heçə ediblər və qalan görüşlərdə məğlubiyyətlə üzləşiblər. UEFA Kuboku (indiki Avroliqa) və İntertoto Kubokunda heç vaxt qələbə sevinci yaşamamış "Valletta"nın ÇL-dəki çıxışını daha uğurlu saymaq olar. Bu turnirdə keçirdiyi 34 matçın 7-də qalib gələn komanda 2 dəfə heç-heçə edib, 25 dəfə məğlub olub (bu mövsüm "Qarabağ"a qarşı keçirilmiş ilk oyun nəzərə alınmayıb).
Maraq üçün qeyd edək ki, nəinki "Valletta", ümumiyyətlə, Malta klubları heç vaxt Azərbaycan klubları ilə avrokuboklarda qarşılaşmayıb. Təbii ki, eynilə "Qarabağ"ın da bu ölkə təmsilçiləri ilə yolları kəsişməmişdi.
"Valleta" son mövsümdə 51 xalla ölkə çempionu olub. Çempion qızıl medalları ikinci yerdə qərarlaşmış "Birkirkara" komandasını 1 xal qabaqlamaqla qazanıb. "Valetta" son mövsümdə 32 oyunda 24 qələbə qazanıb, 5 oyunda isə heç-heçə edib. Ağdam klubunun rəqibi cəmi 3 oyunda məğlub olub. 32 oyunda rəqib qapılarına 74 dəfə yol tapan valettalılar öz qapısından 21 qol buraxıb.
Komandanı 40 yaşlı yerli mütəxəssis Gilbert Acius çalışdırır. Futbolçu karyerası zamanı da uzun müddət bu komandada çıxış etmiş gənc mütəxəssis 2012-ci ildən "Valletta"nın məşqçisi kimi çalışır. Bu ilin yayından isə o, komandaya baş məşqçi təyin olunub.
"Qarabağ"ın rəqibi heç də nəhəng komanda deyil. Bu üzdən də komandamızın "Valletta" səddini keçəcəyinə inam böyükdü. Amma təbii ki, həddən ziyadə arxayınlıq mənfi nəticələrə gətirib çıxara bilər. Buna görə də Qurban Qurbanovun yetirmələri maksimum diqqətli oynamaqla, ələ düşən qol fürsətlərini dəyərləndirməklə, cütün taleyini həll etməlidi. Maltada keçirilən ilk oyunda komandamız ələ düşən çoxsaylı qol epizodlarını dəyərləndirə bilsəydi, cavab matçı formal xarakter də daşıya bilərdi. Amma hər halda 1:0 hesablı qələbə də Ağdam klubunun favorit olduğunu göstərir. İndi sadəcə, cavab görüşündə Maltada başlanılmış işi başa çatdırmaq qalır. Cavab görüşünün Bakıda olması da Ağdam klubunun əsas üstünlüklərindəndi. Belədə "Qarabağ"ın bu şansı əldən qaçırması bağışlanmaz olar.
Ağdam klubu bu mövsüm nəhayət qitə miqyaslı turnirlərdə qrup mərhələsinin iştirakçısı olmaq iddiasındadı. Vaxtilə "Neftçi"nin imza atdığı belə bir uğura Çempionlar Liqasında nail olmaq çətin olsa da, ən azı Avroliqanın qruplarına düşmək mümkündü. Bir neçə dəfə qrup mərhələsinin astanasında dayanan "Qarabağ"dan bu mövsüm gözləntilər çox yüksəkdi. Bu mənada komandamızın yeni avrokubok mövsümünə uğurla start verməsi önəmlidi. Yeri gəlmişkən, artıq ÇL-in üçüncü təsnifat mərhələsindəki rəqib də bəllidi. "Valletta" - "Qarabağ" cütünün qalibi Avstriya "Zalsburq"u ilə qarşılaşacaq.
Sonda onu da bildirək ki, avrokuboklarda qazanılan istənilən uğur Azərbaycanın UEFA-dakı klub reytinqinə də təsirsiz ötüşmür. Belə ki, klublarımızın hər bir qələbəsi ölkəmizə 0,250, heç-heçə isə 0,125 reytinq xalı qazandırır. Hazırda Azərbaycan UEFA reytinqində 53 ölkə arasında 30-cu pillədədi və hesabında 9.875 reytinq xalı var. Bunun 1.000 xalı cari mövsümdə qazanılıb ("İnter" - 0.750, "Qarabağ" - 0.250). "Qarabağ" özü isə 6.975 xalla klub sıralamasında Avropanın 197-ci komandasıdı. "Valletta" da 4.841 reytinq xalı ilə 257-cidi.
Çempionlar Liqası
İkinci təsnifat mərhələsi (cavab oyunu)
22 iyul
21:30. Qarabağ - Valletta
Hakimlər: Sergey Tsinkeviç, Yevgeni Ramanov, Vitali Malyutsin, Denis Şerbakov (hamısı Belarus).
UEFA nümayəndəsi: Adrian İxari (Makedoniya).
Hakim-inspektor: Levan Paniashvili (Gürcüstan).
Bakı. Tofiq Bəhramov adına Respublika stadionu.
İlk oyun - 1:0.