Georgi Lomaya: Bəxtimiz gətirmədi
"İnter"in qapıçısı Georgi Lomaya Avropa Liqasının ikinci təsnifat mərhələsi çərçivəsində İsveç "Elfsborq"una qarşı keçirdikləri cavab matçından (0:1, penaltilərlə 3:4) sonra azerisport.az saytının suallarını cavablandırıb:
- "Elfsborq"a məğlubiyyət haqda nə düşünürsüz?
- Hakim ilk dəqiqələrdən bizi "boğmağa" çalışırdı. Qırmızı vərəqə göstərdi, qapımıza penalti təyin etdi. Bütün oyunumuzu pozdu. 10 nəfərlə qaldıqdan sonra 120 dəqiqə mübarizə aparmaq çox çətin idi.
- Penalti var idi?
- Bu barədə dəqiq heç nə deyə bilmərəm.
- Sizcə, bu cür hakimlik nə ilə bağlı idi?
- Onun niyə belə etdiyini mən də bilmirəm. Çoxları elə düşünürdü ki, hakim bizə kömək edəcək. Çünki klubumuzun prezidenti ilə yerli idi, Bolqarıstandan. Amma hamı nələr baş verdiyini gördü.
- "İnter" 10 nəfərlə qalsa da, qol vəziyyətləri oldu, yenə mərhələ adlamaq şansı var idi...
- Mən hakimliyi ön plana çıxarmaqla özümüzə haqq qazandırmağa çalışmıram. Qol vəziyyətlərimiz olsa da, dəqiq oynamadıq. Sonadək mübarizə apardıq. Penalti isə lotereyadı. Bu mənada bəxtimiz gətirmədi.
- Yalnız bəxt?
- Bəli, bəxtimiz gətirmədi. Özü də bir neçə dəfə.
- "İnter" tarixində üçüncü dəfədi avrokubokları penaltilərdə uduzaraq tərk edir...
- Bəli, bu dəfə də alınmadı. "Lex" və "Asteras"la oyunlarda da belə olmuşdu. Son beş il ərzində biz yalnız bir dəfə penaltilərdə sevinmişik. O da Birlik Kubokunda "Şaxtyor"a qarşı oyunda baş verib.
- Kaxaber Sxadadze oyundan sonra nə dedi?
- Sonadək mübarizə apardığımıza görə komandaya təşəkkürünü bildirdi...
- Oyunun belə ssenari ilə cərəyan edəcəyini gözləyirdiz?
- Əlbəttə. "Elfsborq" çox ciddi komandadı. Bu məğlubiyyəti də faciəyə çevirmək lazım deyil. Həyat davam edir.