Rəşad Sadıqov: Xalqımız məhz Qarabağın qrupa düşməsini çox arzulayırdı
"Qarabağ"ın futbolçusu Rəşad Sadıqovun azerisport.az saytına müsahibəsi
- "Tvente" ilə oyun haqda təəssüratlarını bilmək istərdik...
- Oyun gərgin başladı. Hər iki komanda ehtiyatlı oynayırdı. Bizim qol şanslarımız oldu. Reynaldoyla fərqlənmək imkanı oldu. Alınmasa belə, ruhdan düşmədik. Nəhayət hücumlardan birində Muaremlə buraxılan qolun əvəzini çıxdıq. Son dəqiqələr daha çətin idi. Amma bunu bacardıq.
- Muaremin qolundan sonra inamınız çoxaldı?
- Hesab bərabərləşəndən sonra daha yaxşı oyun göstərdik. Səfərdə oynamaq hər zaman çətindi. Onlar sona qədər mübarizə aparıb hesabı dəyişmək istəyirdi. Çox sevinirik ki, lazımi nəticəni qazandıq. Əsas qrup mərhələsinə düşmək idi.
- Qrup mərhələsində hansı komandalarla qarşılaşmaq istəməzdiz?
- Heç vaxt rəqib seçməmişik. Qismətdi, hansı komandalar düşsə, onlarla oynamağa hazırıq. Qrup mərhələsində zəif komanda olmur. Seçmək imkanı da olmur. Kim düşsə, sona qədər mübarizə aparmağa hazırıq.
- Komanda qrupa düşməklə məqsədinə çatdı. Növbəti hədəf nə olacaq?
- Bir hər zaman növbəti oyun haqda düşünürük. İndi çempionat matçlarında iştirak edəcəyik. Qrup mərhələsində isə bir-bir oyunlara hazırlaşacağıq. Hər bir oyunda müsbət nəticə məqsədimiz olacaq. Azarkeşləri sevindirmək üçün mübarizə aparmaq lazımdı.
- "Qarabağ" 4-cü cəhdində qrup mərhələsinə vəsiqə qazandı. Qələbəni kimə həsr edirsiz?
- Uğurumuz xalqımızın, köçkünlərimizin, ürəyi "Qarabağ"la döyünən insanlarındı. Biz qələbəni onlara həsr edirik. Ola bilərdi başqa komanda uğur qazanardı, ola bilərdi başqa klub qrupa düşəydi. Amma bilirəm ki, Azərbaycan xalqı məhz "Qarabağ"ın qrupa düşməsini çox arzulayırdı. Çox istəyirdilər, şükür olsunlar ki arzunu reallaşdırdıq.
- Qrupdakı rəqiblər daha çətin olacaq. Orara nə qədər xal toplamaq mümkündü?
- Gəlin rəqibləri gözləyək. Qrup mərhələsinə düşdük. Artıq hər oyunda maksimum hədəfimiz olacaq. Rəqibləri təhlil etdikdən sonra bu barədə danışmaq olacaq. İndi bir qədər istirahət etmək, sonra isə çempionat oyunları barədə düşünmək lazımdı.