Elxan Məmmədov: Mərkəzi arena Qarabağ - Sent-Etyenn matçına hazır olacaq
AFFA-nın baş katibi Elxan Məmmədovun azerisport.az saytına müsahibəsi
- Bakıda keçirilmiş çimərlik futbolu üzrə Avropa Kuboku barədə nə deyə bilərsiz?
- Vacib turnir idi. O, Avropa Oyunları öncəsi test xarakteri daşıyırdı. Yarışın təşkilindən razı qaldıq. Şadam ki, finalda iki güclü komandanın qarşılaşmasını gördük.
- "Qarabağ"ın Avroliqanın qrup mərhələsinə vəsiqə qazanmasını necə qarşıladız?
- Bu, Azərbaycan futbolunun sabitliyinin göstəricisidi. Püşkə gəlincə, əlbəttə, daha zəif rəqiblərlə də qarşılaşa bilərdik, güclü rəqiblərlə də. "İnter"in əvvəlki kimi güclü olmadığını deyənlərlə razı deyiləm. "Dnepr"in oyununu görməmişəm. Amma "Sent-Etyenn"in ounlarına baxmışam, çox güclü komandadı, yaxşı oyunçuları var. Mənə elə gəlir ki, biz "Qarabağ"a bu oyunlarında yaxşı dəstək göstərməliyik.
- Tofiq Bəhramov adına Respublika stadionu nə vaxt hazır olacaq?
- Mərkəzi arenanın durumu bizi də narahat edir. Bu stadion gənclər və idman nazirliyinin balansındadı. Amma biz nazirliklə, stadion rəhbərliyi ilə danışıqlar aparmışıq, vəziyyətdən çıxış yolu axtarmağa çalışmışıq. Əlimizdən gələni etməliyik ki, stadion sentyabrın 18-də keçiriləcək "Qarabağ"la "Sent-Etyenn" arasındakı oyuna qədər tam hazır olsun. Axı bu oyuna bütün Avropa baxacaq. Bundan bir həftə sonra isə UEFA AÇ-2020-yə ev sahibliyi edən şəhərlərin adını açıqlayacaq.
- Bakının şansları necədi?
- Çox istəyirik ki, paytaxtımız da həmin oyunları keçirəcək şəhərlər arasında olsun. 19 şəhərdən 13-ü seçilməlidi.
