Qurban Qurbanov: Sent-Etyen ilə oyunda ən yaxşı nəticə üçün çalışacağıq
"Qarabağ"ın baş məşqçisi Qurban Qurbanovun azerisport.az saytına müsahibəsi
- Ötən gün Tofiq Bəhramov adına Respublika stadionunun qazonuna baxış keçirmisiz. Necədi?
- Pis deyil. Hələlik, yumşaqdı. Fikrimcə, oyuna qədər yaxşı vəziyyətdə olacaq.
- Yeni qazonun keyfiyyətindən razı qaldız?
- Çox yaxşıydı. Təbbi ki, bundan əvvəlkindən fərqlənir. Bir aya ideal səviyyədə olar.
- Qazonun oyuna qədər 100 faiz hazır olmaması oyununuza təsir edə bilər?
- Düşünmürəm. Yadımdadı ki, ötən mövsüm Almaniya "Ayntraxt"ı ilə oyunumuzda da rəqibin stadionuna yenicə qazon döşənmişdi. Amma bu, oyunçularımız üçün xüsusi problem yaratmadı.
- Fransa "Sent-Etyen"i ilə oyuna hazırlıq necə gedir?
- Yaxşı. Zədəlilərin olmaması sevindirir. Rəqibi analiz etməyə davam edirik. Fikrimcə, bizi maraqlı oyun gözləyir.
- Fransızlar Avroliqanın pley-off mərhələsində Türkiyə "Karabükspor"una qarşı elə də yaxşı oyun sərgiləməmişdilər...
- İndi onlar yaxşı oynayırlar. Fransa çempionatında ikinci pillədə olmaları təsadüfi deyil. Bu, nədənsə xəbər verir. Kollektiv olaraq müdafiə olunurlar, hücuma keçirlər. Diqqətli olmalıyıq. Kifayət qədər təcrübəli futbolçuları var. Hücum xəttində texnikalı oyunçuları çoxdu. Bu da bizim müdafiə xəttimizə problem yarada bilər.
- Azərbaycan komandaları standart vəziyyətlər zamanı yaxşı müdafiə oluna bilmirlər. Bu planda komandanızın çətinlik çəkməsi mümkündü?
- Təəssüf ki, "Sent-Etyen" də standart vəziyyətlər zamanı təhlükəli komandalardandı. Buna görə xüsusi diqqətli olmağımız lazımdı.
- "Qarabağ" Avroliqanın qrup mərhələsində debüt etmiş olacaq. Belə bir oyunda heç-heçə də sizin üçün qənaətbəxş sayıla bilər?
- İstənilən nəticəyə hazır olmaq lazımdı. Uduza da bilərik, uda da. Mümkündü ki, heç-heçə də bizi qane etsin. Amma biz istənilən halda ən yaxşı nəticə üçün çalışacağıq. Çünki bizi dolu tribunalar dəstəkləyəcək.