Azərbaycan millisindən 22 pilləlik geriləmə
Futbol üzrə Azərbaycan yığması FİFA-nın reytinq cədvəlində tarixinin ən yüksək göstəricisi olan 73-cü pillə ilə vidalaşıb. Azerisport.az xəbər verir ki, sentyabr ayı üçün açıqlanan reytinq cədvəlində millimiz 22 pillə geriləmək məcburiyyətində qalıb.
Rusiya ilə yoxlama, Bolqarıstanla seçmə mərhələ oyunlarındakı məğlubiyyətlər komandamızın hazırda 95-ci pillədə qərarlaşmasına səbəb olub. Ötən ayla müqayisədə reytinq xalından da 69 xal çıxılan millimizin hesabında hazırda 344 xal var.
Millimiz reytinq cədvəlində AÇ-2016-nn təsnifat mərhələsinin “H” qrupundakı rəqiblərindən yalnız Maltanı qabaqlayır: İtaliya 13-cü (1068 xal), Xorvatiya 19-cu (928 xal), Bolqarıstan 46-cı (570 xal), Norveç 76-cı (421 xal), Malta 155-ci (133 xal) pillədə qərarlaşıb.
Keçmiş Sovet İttifaqı ölkələrindən reytinq cədvəlində ən yüksək pilləni Rusiya tutur: 23-cü pillə, 875 xal. Ukrayna isə 24-cü (855 xal) pillədə qərarlaşıb. Ermənistan 52-ci (556 xal), Özbəkistan 58-ci (530 xal), Estoniya 81-ci (403 xal), Belarus 89-cu (364 xal) sırada yer alıb və millimizi qabaqlayırlar. Latviya (99; 333), Litva (103; 309), Moldova (105; 302), Gürcüstan (110; 290), Qazaxıstan (127; 239), Tacikistan (136; 213), Türkmənistan (141; 197) və Qırğızıstan (151; 158) isə millimizdən alt sıralarda qərarlaşıb.
Türkiyə 637 xalla 38-cidi.
Ayın ən yaxşı göstəricisi 76 pillə irəliləmiş Qvatemala yığmasına məxsusdu. Ən pis göstəriciyə isə Toqo yığması imza atıb - 38 pillə geri.
İlk onluq isə belə sıralanıb: Almaniya (1765 xal), Argentina (1631), Kolumbiya (1488),Hollandiya (1456), Belçika (1444), Braziliya (1291), Uruqvay (1243), İspaniya (1228), Fransa (1202) İsveçrə (1175).