Azərbaycan derbisi və autsayder savaşı
Bu gün və sabah Topaz Premyer Liqasında 7-ci turun oyunları keçiriləcək. Azerisport.az xəbər verir ki, milli komandaların oyunları ilə əlaqədar yaranacaq fasilədən öncə baş tutacaq turun görüşləri iki gündə reallaşacaq.
Həftənin mərkəzi oyunu “Neftçi” və “Qarabağ” arasında olacaq. Milli çempionatlar tarixində güclülər dəstəsinin daimi iştirakçısı olan iki komanda 57-ci dəfə qarşılaşacaq. Bu oyunadək eyni sayda (17) qələbəyə malik rəqiblərin duellərində “Neftçi” yalnız top fərqində öndədi - 54:52. Amma son 4 oyunda cəmi 2 xal qazanan bakılılar öz meydanındakı 4 qarşılaşmada 1 heç-heçə edə bilib. Tərəflər bütövlükdə 22 dəfə meydanı sülhlə tərk ediblər. Son çempionla kubokun qalibi mövsümə çox yaxşı başlamasa da, hər halda turnir cədvəlinin üst pillələrindədilər. Meydan sahibi olaraq müəyyən üstünlüyə malik Arif Əsədovun komandası qalib gəlsə, liderlər qrupunda mövqeyini möhkəmləndirəcək. Ağdam təmsilçisi qalib gələcəyi halda isə, ən azı "Neftçi"ni qabaqlamış olacaq. Baxmayaraq ki, Avropa Liqasının qrup mərhələsi çərçivəsində İtaliya "İnter"i ilə oyun ərəfəsində bu komandanın Azərbaycan derbisində tam gücü ilə mübarizə aparması bir o qədər də inandırıcı görünmür.
Bu oyunla eyni saatda “Bakı” doğma meydanda “Araz Naxçıvan”la qarşılaşacaq. 13 ildən sonra yeni ad altında üz-üzə gələcək komandalar 5-ci duelə çıxacaq. Bu oyunlarda minimal üstünlük Naxçıvan təmsilçisinin tərəfindədi. Onlar son iki oyunda da qalib gəlib. Bir qarşılaşmada zolaqlılar sevinibsə, daha bir qarşılaşma sülhlə bitib. Top fərqində isə naxçıvanlılar öndədilər - 6:2. İlk turda "Neftçi" üzərindəki qələbədən sonra bir qayda olaraq, məğlubiyyətləri sıralayan Əsgər Abdullayevin komandası uğursuz gedişata son qoymaq üçün yaxşı şansa malikdi. Rəqib düşərgədə isə vəziyyət daha acınacaqlıdı. Maliyyə problemlərindən əziyyət çəkən, gənclərin ümidinə qalan "zolaqlılar" son turda da "İnter"ə biabırçı hesabla uduzub. Bakılılar özü kimi autsayderə çevrilən "Araz Naxçıvan"la görüşdə həmin yenilgini unutdurmağa çalışacaq. Mümkündü ki, paytaxt təmsilçisi yeni mövsümdə ilk qələbəsini də qazansın. Amma bunun heç də asan olmayacağı dəqiqdi.
Günün son oyununda isə lider "İnter" səfərdə AZAL-la qarşılaşacaq. 23-cü paytaxt derbisi öncəsi “İnter” daha çox qələbə qazanıb - 7. Son 3 qarşılaşmada qalib gələn bu komanda rəqib meydanında 4 matçdı ki, uduzmur. AZAL paytaxt derbilərində cəmi 5 dəfə qalib gəlib. Daha 10 qarşılaşmada isə heç-heçə qeydə alınıb. “İnter” top fərqində də cüzi üstünlüyə malikdi - 19:18. "Bankirlər" bu görüşdə də favoritdilər. Yeni mövsümə yaxşı başlayan, hazırda turnir cədvəlinə başçılıq edən bu komanda sərgilədiyi futbola görə AZAL-dan daha üstün görünür. Tərlan Əhmədovun komandası isə əksinə, qeyri-sabit çıxışı ilə seçilir. Son turda "Sumqayıt"ı lider kürsüsündən endirən "təyyarəçilər"in bu dəfə də "İnter"ə eyni aqibəti yaşatmağı nə dərəcədə bacaracağını zaman göstərəcək.
Son oyun günündə öncə “Simurq” “Sumqayıt”la münasibətlərinə aydınlıq gətirəcək. “Simurq” 10 dəfə qarşılaşdığı rəqibi ilə oyunlarda böyük üstünlüyə malikdi. Bu komanda əvvəlki görüşlərin 9-da qələbə qazanıb. “Sumqayıt”ın uduzmadığı yeganə qarşılaşma son duelə təsadüf edib. Zaqatala təmsilçisi öz meydanında xal da itirməyib. Top fərqi də "Simurq"un xeyrinədi - 17:4. Georgi Çixradzenin komandası son 3 turda üzləşdiyi məğlubiyyətləri unutdurmağa çalışacaq. Cari mövsümə çox uğurlu başlayan Aqil Məmmədovun komandası isə tarixində ilk dəfə "Simurq"a qalib gəlmək üçün mübarizə aparacaq. Amma bu komandanın çətin səfərdən hətta 1 xalla qayıtması da uğur sayıla bilər.
Turun qapanış matçında isə “Qəbələ” “Xəzər Lənkəran”la qarşılaşacaq. Qeyri-sabit oyun sərgiləyən tərəflərin bu duelində kimin güləcəyi maraqla gözlənilir. Əyalət klublarının 23-cü çempionat matçına qonaqlar üstünlüklə çıxacaq. “Xəzər Lənkəran” oyunların yarıdan çoxunda (12-də) qalib gəlib. Cənublular son iki oyunda 3 xal qazanıb. “Qəbələ” son 3 ev matçının hərəsində 2 qol vurub. Əvvəlki görüşlərin 5-də heç-heçə qeydə alınıbsa, 5-də də "Qəbələ" qalib gəlib. Top fərqində də qəbələlilər geridədi - 19:31.
Topaz Premyer Liqası
7-ci tur
27 sentyabr
16:00. Neftçi - Qarabağ
Hakimlər: Orxan Məmmədov, Elman Musayev, Knyaz Əmiraslanov, Ramiz Məhərrəmov
Bakı. İsmət Qayıbov adına Bakıxanov qəsəbə stadionu.
16:00. Bakı - Araz Naxçıvan
Hakimlər: İnqilab Məmmədov, Munis Abdullayev, İsgəndər Əliyev, Teymur Fərhadov.
“Bakı” FK-nın təlim-məşq bazasının stadionu.
17:00. AZAL - İnter
Hakimlər: Elvin Əsgərov, Nahid Əliyev, Rza Məmmədov, Mahir Məmmədov
Bakı. “AZAL Arena”.
28 sentyabr
18:00. Simurq - Sumqayıt
Hakimlər: Ramil Diniyev, Azər Əsgərov, Rəvan Həmzəzadə, Sərxan İsmayılov
Zaqatala şəhər stadionu.
19:00. Qəbələ - Xəzər Lənkəran
Hakimlər: Ömər Paşayev, Mehman Mahmudov, Elşən Acalov, Ramil Əhmədov.
Qəbələ şəhər stadionu.
1 | İnter | 6 | 4 | 1 | 1 | 19 | 3 | +16 | 13 |
2 | Sumqayıt | 6 | 4 | 0 | 2 | 8 | 7 | +1 | 12 |
3 | Neftçi | 5 | 3 | 1 | 1 | 4 | 4 | 0 | 10 |
4 | Qəbələ | 6 | 3 | 1 | 2 | 6 | 7 | –1 | 10 |
5 | Qarabağ | 5 | 2 | 2 | 1 | 6 | 5 | +1 | 8 |
6 | Xəzər L | 6 | 2 | 1 | 3 | 4 | 5 | –1 | 7 |
7 | AZAL | 5 | 2 | 1 | 2 | 4 | 7 | –3 | 7 |
8 | Simurq | 5 | 2 | 0 | 3 | 6 | 5 | +1 | 6 |
9 | Araz N | 5 | 1 | 0 | 4 | 4 | 7 | –3 | 3 |
10 | Bakı | 5 | 0 | 1 | 4 | 3 | 14 | –11 | 1 |
Bombardirlər:
4 - Mikel Alvaro (İnter)
3 - Baçana Sxadadze (İnter), Məhəmməd Qurbanov (Sumqayıt), Rəşad Eyyubov (Simurq).