Elxan Abdullayev: Mən Qurban Qurbanovun namizədliyinin əleyhinəyəm
Futbol üzrə Azərbaycan yığmasının sabiq məşqçisi Elxan Abdullayevin azerisport.az saytına müsahibəsi
- Berti Foqtsun istefasını necə qarşıladız?
- Gözləmirdim. İndi hamını bir sual düşündürür ki, vəziyyət yaxşılaşacaq, yoxsa daha da pisləşəcək? Çox insan onun gedişini sevinclə qarşılayır. Amma mən nəticə çıxarmağa tələsmək istəmirəm. Vəziyyət elədi ki, heç də adi dövr yaşamırıq. Seçmə mərhələdəki rəqiblərimiz də çox güclüdü. Yeni baş məşqçinin kim olacağı da bəlli deyil.
- Sizcə, yığmamıza kim rəhbərlik etməlidi?
- Hansısa yığmaya baş məşqçilik etmiş bir mütəxəssis olmalıdı. Həm də Foqtsun yerinə elə biri gətirilməlidi ki, onun səhvlərini təkrarlamasın. Alman mütəxəssisin Azərbaycanda az vaxt keçirməsini bəyənmirdik. İndi elə biri gətirilməlidi ki, hər gününü burada keçirsin. Yaşlı olmasını tənqid edirdik, deməli, daha enerjili, gənc mütəxəssislə anlaşmalıyıq.
- Yerli mütəxəssis gətirilməsinin tərəfdarı deyilsiz?
- Mən həmişə yerli mütəxəssislərin tərəfdarı olmuşam. Amma burada yığma komandadan söhbət gedir. Hazırda elə obyektiv və subyektiv amillər var ki, yerli mütəxəssislər arasında millini bu bataqlıqdan çıxaracaq məşqçi görmürəm.
- Niyə?
- Çoxlu amillər mövcuddu. Sirr deyil ki, azərbaycanlı məşqçilər üzərində təzyiq üçqat olacaq. Azarkeşlər tərəfindən də təzyiqlər böyük olacaq. Düşünmürəm ki, belə tələb və təzyiqlər altında hansısa yerli mütəxəssis nəticə verə bilsin. Futbolçularımızın da potensialı hər kəsə bəllidi.
- Azarkeşlər yığmanın Qurban Qurbanova tapşırılmasını istəyirlər...
- Mən onun namizədliyinin əleyhinəyəm. Ona qarşı heç bir qərəzim yoxdu. Sadəcə, hesab edirəm ki, Qurbanov hazırda milliyə rəhbərlik etməyə hazır deyil. Belə bir təcrübəsi yoxdu. Yığmada və klubda çalışmaq tamamilə fərqlidi. Qurbanov klub məşqçiləri arasında bir nömrədi. Düşünürəm ki, millidə çalışmaq vaxtı da gələcək.
- Bəs siz kimi təklif edirsiz?
- Mən xaricdən məşqçi gətirilməsinin tərəfdarıyam. Onun heç adlı-sanlı olması da vacib deyil. Sadəcə, o, bizim kriteriyalarımıza uyğun biri olmalıdı. Britaniya futbolunda hazırda böyük yüksəliş var. İrlandiya, Şimali İrlandiya və İngiltərə yığmaları hazırda öz qruplarında birinci yerdə gedirlər, Şotlandiya və Uels də yüksəlişdədi. Elə bir mütəxəssis gətirməliyik ki, bizi bu böhrandan çıxara bilsin. Bizim futbolu yaxından tanıması da vacib deyil. Guya Fabio Kapello Rusiyaya gələndə bu ölkənin futbolunu yaxşı tanıyırdı? Yeni gələn məşqçi üçün çempionatın 5-6 turununun oyunlarını izləmək yetərlidi.
