Berti Foqts: Bu oyunçularla bundan artığına nail ola bilməzdim
Futbol üzrə Azərbaycan yığmasının sabiq baş məşqçisi Berti Foqts Almaniya mətbuatına müsahibə verib. Azerisport.az sizi həmin müsahibə ilə tanış edir.
- Deyirlər siz Azərbaycan yığmasından istefa vermisiz...
- Nə? İnanmıram ki, bu, Almaniyada o dərəcədə vacib bir məsələdi.
- Siz Xorvatiyaya 0:6 hesablı məğlubiyyətə görə belə addım atdız?
- Bəli. Mən sadəcə, bezdim.
- Seçmə mərhələdəki uğursuzluqlardan?
- Məsələ təkcə nəticələrdə deyil, yaranan vəziyyətdədi. İtaliya ilə oyundan sonra komandanın Xorvatiyaya qarşı mübarizə aparmağa gücü qalmamışdı.
- Niyə?
- Çünki yeddi il idi futbolçular məndən həmişə eyni sözləri eşidirdi: "Siz öz üzərinizdə daha çox çalışmalısız, daha çox qaçmalısız". Eşidirdilər, amma heç nə etmirdilər. Klublarda normal məşq yox idi. İtaliyaya qarşı oynamayan futbolçular məşqlərə həvəssiz yanaşırdılar. Mən də bütün bunlara bundan artıq dözə bilməzdim.
- Siz komandanızın AÇ-2016-ya vəsiqə qazanacağına ümid edirdiz?
- Düzünü desəm, hə. Amma püşk bizə İtaliya, Xorvatiya, Norveç və Bolqarıstan kimi rəqibləri qismət etdi. Xorvatiyaya sonuncu məğlubiyyətdən sonra mən və iki köməkçim - Uli Ştyanla Volfqanq Rolf oradan getməyə qərar verdik.
- Azərbaycandakı yeddi illik fəaliyyətdən nə nəticə çıxardız?
- Bu, çox çətin dövr idi. Amma nəyəsə nail ola bildim. Komanda FİFA reytinqində 147-ci yerdən 37-dək yüksələ bildi. Problem ondadı ki, Azərbaycanda futbolu pula görə oynayırlar. Oradakı futbolçular futbolla yaşamırlar. Əksər futbolçulara xaricdə oynamağı təklif edirdim. Amma belə edəcəkləri halda onlar Azərbaycanda qazandıqlarından beş dəfə az qazanc əldə edəcəkdilər. Mən komandada gəncləşdirmə siyasəti aparmağa başlasam da, vəziyyət düzəlmək bilmirdi. Onlarla bundan artığına nail ola bilməzdim.
- Karyeranızı davam etdirmək üçün hansı planlarınız var?
- Xeyr, indi mən heç bir iş görmürəm. Qolfla məşğulam.