Ristoviç: Hələ də başa düşə bilmirəm ki, hakim həmin penaltini niyə təyin etdi
"Bakı"nın yarımmüdafiəçisi Risto Ristoviç Topaz Premyer Liqasının 8-ci turu çərçivəsində qarşılaşdıqları "Xəzər Lənkəran"la oyunu şərh edib. Azerisport.az saytına açıqlamasında o, öncə bunları söyləyib:
"Xəzər Lənkəran"a qarşı yaxşı oynadıq. İlk 35 dəqqədə rəqibə qol şansı vermədik. Amma hakim qapımıza penalti təyin etdi. Mən hələ də başa düşə bilmirəm ki, həmin penaltini nəyə görə verdi. Təkcə mən yox, ümumiyyətlə heç kim".
Serb xavbekin fikrincə, Əliyar Ağayev bu oyunu pis idarə edib: "Həmin hakimin adını da bilmirəm. Amma dəqiq bilirəm ki, o, qapımıza penaltini heç nədən təyin etdi. Əminəm ki, orada heç bir qayda pozuntusu olmamışdı. Bütövlükdə, oyunu çox pis idarə etdi. Demək olar ki, oyunumuzu sındırdı. Heyətimizdə gənc futbolçular çoxdu. Amma belə qərarlar onlara, onların oyunlarına çox pis təsir göstərir".
Ristoviç onu da qeyd edib ki, ilk penalti olmasaydı, "Xəzər Lənkəran"a 4 cavabsız qolla uduzmazdılar: "Daha sonra bizim oyunçumuza qırmızı vərəqə də göstərildi. Ardından daha bir penalti təyin edildi. Nə baş verdiyini, hakimin niyə belə qərarlar verdiyini hələ də başa düşə bilmirəm. Düzdü, XL yaxşı oynadı, bunu inkar etmirəm. Amma ilk penalti olmasaydı, heç kim matçın necə başa çatacağını deyə bilməzdi".
