Georgi Çixradze: Hakimin penalti qərarı doğru idi
"Simurq"un baş məşqçisi Georgi Çixradzenin azerisport.az saytına müsahibəsi
- AZAL ilə 4 qolluq oyundan sülhlə ayrıldız. Təəssüratlarınız necədi?
- Bu oyunu iki fərqli hissəyə ayırmaq olar. Birinci hissədə uğurlu çıxış etdik, çox fəal idik. Qol vurduq, ondan sonra da imkanlarımız var idi. Qol vəziyyətlərindən yararlana bilməməyimiz rəqibin iki qol vuraraq önə keçməsinə səbəb oldu. Çətin vəziyyət yaranmışdı. Xoşbəxtlikdən sonda hesabı bərabərləşdirməyi bacardıq. Fikrimcə, hesab oyuna görə oldu.
- Rəqib ilk qolu penaltidən vurdu. Adətən, belə oyunlardan sonra baş məşqçilər xal itkisində hakimləri qınayır. Bəs siz?
- Orada penalti var idi. Qərarla razıyam.
- Razısız ki, sizin də hesabı bərabərləşdirməyinizə rəqib qapıçı "kömək etdi"?
- Əli Gökdəmirin uzaqdan çox yaxşı zərbələri var. Məşqlərdə də bunu görürük. Qapıçılar üçün belə zərbələrə reaksiya göstərmək çox çətindi. Onun bu oyundakı zərbəsinin də trayektoriyası qapıçı üçün çətin idi.
- Qısa zaman kəsiyində növbəti matça çıxmaq çətin deyildi?
- Düzünü deyim ki, xüsusi bir fərq yox idi.
- Amma bu həftə sizi daha bir oyun gözləyir...
- Bu vəziyyət çempionatın bütün iştirakçılarına aiddi. Belə qrafiklə tək biz oynamırıq.
- "Xəzər Lənkəran"la oyundan nə gözləyirsiz?
- Komandaların şanslarını dəyərləndirməyi xoşlamıram. Hazırda Bakıdayıq. Zaqatalaya bilərəkdən qayıtmadıq ki, uzun səfərlərdə əlavə vaxt itirməyək. Lənkərana birbaşa paytaxtdan gedəcəyik.
- Birinci dövrəni necə dəyərləndirərdiz?
- Qeyri-qənaətbəxş saymaq olar. Xeyli xal itirdik. Bunun da obyektiv və subyektiv səbəbləri vardı. Məsələn, Draqan Çeranın 4 oyunluq cəzalanması, bəzi futbolçuların zədələnməsi. 3-4 xal daha çox toplaya bilərdik.
- Son oyunlarınızda Rəşad Eyyubov özünü yaxşı tərəfdən göstərə bilir və artıq 6 qolla bombardirdi. Amma yerli futbolçular kiçik bir uğur göstərən kimi, tempi aşağı salırlar...
- Biz Rəşadla danışmışıq. Onun arxayınlaşmasını istəmirik. Üzərində daha çox çalışmasını istəyirik. Amma əldə etdiyi uğurlar da qeyd olunmalıdı. Belə davam etməlidi.