Muarem: Qarabağda heç bir yorğunluq yoxdu
"Qarabağ"ın yarımmüdafiəçisi Muarem Muaremin azerisport.az saytına müsahibəsi
- "İnter"lə oyun haqda nə deyə bilərsiz?
- Ağır oyun oldu. "İnter" yaxşı komandadı. Bizə qarşı həmişə yaxşı oynayıblar. Biz özümüzü Premyer Liqanın ən yaxşı komandası hesab etmirik, mən də belə iddia irəli sürə bilmərəm. Amma "İnter" komanda oyununa görə bizimlə bərabər səviyyəli bir komandadı. Bizim oyunumuzu yaxşı analiz etmişdilər. Ona görə çox qol vəziyyəti yarada bilmədik. Bir-iki real qol vəziyyətimiz olsa da, onlardan yararlana bilmədik. Hər halda bir xal da xaldı.
- "Qarabağ"a qələbə qazanmaq üçün nə çatmadı?
- Dediyim kimi, çox qol vəziyyətləri yada bilmədik, yaratdığımız epizodlardan da yaxşı yararlanmadıq. Ən azı bir qol şansını dəyərləndirsəydik, qələbə qazana bilərdik.
- Gərgin qrafik yorğunluq yaratmır?
- Xeyr. Komandada heç bir yorğunluq yoxdu.
- Qarşıda sizi "Araz Naxçıvan"la çempionat, "Dnepr"lə Avroliqa oyunu gözləyir...
- Asan qrafik deyil. Amma biz əvvəllər də belə gərgin qrafikdə oynamışıq. Çalışacağıq ki, hər iki rəqibimizi yaxşı analiz edək və maksimum nəticə qazanaq.
- Belə qrafikdə zədələrlə üzləşməkdən qorxmursuz?
- Buna görə zədə problemi ilə üzləşəcəyimizi düşünmürəm. Çünki Qurban Qurbanov tez-tez heyətdə dəyişiklik edir. Məsələn, "Xəzər Lənkəran"a qarşı bir heyət oynadı, "İnter"ə qarşı o biri. Hərdən belə oyunlar bizə məşqdən daha çox fayda verir. Yorğunluq yoxdu. Məşqçilər də futbolçulara öz göstərişlərini verirlər ki, zədələrdən uzaq olaq.
