Rəşad Sadıqov: Sent-Etyen haqda hələ düşünmürük
"Qarabağ"ın kapitanı Rəşad Sadıqovun azerisport.az saytına müsahibəsi
- "Bakı" ilə oyun (4:2) haqda nə deyə bilərsiz?
- Çətin olacağını bilirdik. "Bakı" bu mövsüm liderlərə qarşı çox yaxşı oyun sərgiləyir. Biz ələ düşən imkanlardan maksimum yararlanmağa çalışdıq və qalib gəldik.
- Rəqib hakimlikdən şikayətlənir...
- Oyun zamanı bəzi mübahisəli epizodlar oldu. Amma biz hələ onlara baxmamışıq. Ona görə də indidən heç nə deyə bilmərəm.
- 60-cı dəqiqədə hesabın 2:2 olması "Qarabağ"ın arxayınlığından xəbər vermir?
- Deməzdim. Düzünü deyim ki, oyunun bu qədər çətin olacağını gözləmirdik. Əminəm ki, "Bakı" bütün komandalar üçün belə başağrı olacaq. Onların yaxşı, gənc futbolçulardan ibarət heyətləri var.
- Belə gərgin qrafiklə bu oyuna hazırlaşmaq çətin olmadı?
- Əlbəttə, asan deyil. Amma buna məcburuq.
- "Sent-Etyen"lə Avroliqa oyunu haqda düşünmürsüz?
- Xeyr. Bizim qarşıda hələ AZAL-la da oyunumuz var. Fransa klubu ilə oyun haqda ondan sonra düşünərik.
- Yığmanın baş məşqçisi Mahmud Qurbanovun Norveçlə oyunda Bədavi Hüseynovu ehtiyatda saxlaması sizi təəccübləndirmədi?
- Bu heyət məşqçilərin taktikasına uyğun qurulmuşdu. Norveçlilərin ucaboy futbolçuları çox idi. Yəqin ki, buna görə daha ucaboy olan Elvin Yunuszadəyə güvənilmişdi.
- Yığmanın baş məşqçisi postunda yerli mütəxəssis görmək istəyirsiz, ya əcnəbi?
- AFFA hazırda yeni baş məşqçi axtarışlarını davam etdirir. Əsas odu. Bizim işimiz məşq etmək, oynamaqdı.