Abdullayev: Ümid edirəm ki, milli Prosineçkinin rəhbərliyi altında daha yaxşı oynayacaq
Azərbaycanın futbol mütəxəssisi Oqtay Abdullayevin azerisport.az saytına müsahibəsi
- Yığmamızda Berti Foqts erası başa çatdı. Böyük ehtimalla bundan sonra xorvatiyalı Robert Prosineçkinin erası başlayacaq...
- Azərbaycan yığmasının bu qədər zəifləməsində yalnız Berti Foqts günahkar deyil. Bunda veteranlarımız da günahkardı. Əgər futbolumuzun daha da güclənməsini istəyiriksə, o zaman bütün işlərdə aktiv iştirak etməliyik.
- Necə?
- Öz məsləhətlərimizi verməliyik. Hamımız deyirik ki, uşaq futbolunu inkişaf etdirməliyik. Amma kim durub bunu necə etmək lazım olduğunu açıqlayıb? Hər kəs öz proqramını hazırlayıb təqdim etməlidi.
- Məsələn, siz nə məsləhət verirsiz?
- Mən məsləhət vermirəm, reallaşdırıram. Bu yaxınlarda bəzi veteranlarla bir araya gəlib məsləhətləşdik. Premyer Liqanın oyunlarına çox az insan gəlir. Bu barədə düşünmək lazımdı. "Qarabağ"ın Avroliqadakı oyunlarına çox adam gəldiyi halda, niyə Premyer Liqaya maraq olmamalıdı?
- Bəlkə onlara çempionat oyunları maraqlı deyil?
- İstənilən halda çıxış yolu tapmaq lazımdı. Belə olmaz. Azarkeş marağı olmasa, inkişaf da olmayacaq. Hər kəs yerində oturub danışa bilər. İş görmək lazımdı. Bundan sonra veteranlar bir yerdə çempionat oyunlarına gedəcəklər, oyunları izləyəcəklər. AFFA ilə də danışıqlar aparacağıq. Baş katib Elxan Məmmədovla məshələtləşmişəm, o, bizim ideyamızı dəstəklədiyini deyib. Bizim 10 məsləhətimizdən ən azı ikisi realda həyata keçsə, bu, uğurumuz olacaq.
- Robert Prosineçkinin Bakıya gəlişini necə qarşıladız?
- Şəxsən mən onun təyinatının əleyhinə deyiləm. Prosineçki cavan və iddialı mütəxəssisdi.
- Sizcə, o, bizə nə verə bilər?
- Xorvatiya futbolu son illər çox inkişaf edib, yaxşı məktəbləri var. Qoy işləsin, görək nə edə biləcək. Ümid edirəm ki, onun rəhbərliyi altında Azərbaycan yığması daha yaxşı oynayacaq.
- "Qarabağ"dan Fransada nə gözləyək?
- Çox təəssüf ki, belə bir oyunda komandanın aparıcı futbolçuları oynaya bilməyəcək. Qurban Qurbanovun nəsə düşünəcəyinə əminəm. "Sent-Etyen"i səfərdə məğlub etməyin çətin olduğunu başa düşürəm. Amma çox istərdim ki, ağdamlılar səfərdən qələbə ilə dönsün. Fransada böyük erməni diasporu var və onlar artıq təxribata başlayıblar. Komandamız qrup mərhələsinə düşməklə onsuz da əsas vəzifəsinin öhdəsindən gəlib. İndi isə bizə daha yaxşısına ümid etmək qalır.