Elvin Məmmədov: İkinci epizodda heç bir kobudluq etməmişdim
"İnter"in yarımmüdafiəçisi Elvin Məmmədovun azerisport.az saytına müsahibəsi
- "Qəbələ" ilə oyundakı çıxışınızdan razı qaldınız?
- Gərgin qrafiklə oynadığımızı nəzərə alsaq, yorğunluq vardı. Həm də futbolçularımız sintetik örtükdən təbii ot örtüyünə keçmişdi. Bunun da öz çətinlikləri var. Çətin oyun olsa da, bir xal qazana bildik.
- Amma oyun sizin üçün daha erkən bitdi: iki xəbərdarlıqdan sonra meydandan qovuldunuz...
- Karyeramda ikinci dəfədir ki, meydandan qovuluram. Birincisi "Bakı"da olmuşdu. Bu dəfə aldığım qırmızı vərəqə az qala komandamın oyununa təsir edəcəkdi. Bəs biz uduzsaydıq, necə olacaqdı?
- İkinci hissədə Fariz Yusifov Mikel Alvaronu vuran Kamran Ağayevin hərəkətini görmədi. Amma sizi cəzalandırdı...
- Hakimlikdən danışmaq istəmirəm. Fariz Yusifov təcrübəli hakimdir. Amma onun məni niyə meydandan qovduğunu anlamadım. Çünki ikinci epizodda heç bir kobudluq etməmişdim. Mən topa qaydanı pozmadan toxunmuşdum. Artıq gecdir. Ona zəng edib, bunun səbəbini soruşacağam, görüm nə deyəcək.
- "İnter"in bu oyunda 1 xal qazandığını demək olar, ya iki xal itirdiniz?
- Biz liderlik uğrunda mübarizə aparırıq. Ona görə də bu, istənilən halda bizim üçün xal itkisidir. Qələbə çox yaxşı nəticə olardı. Amma heç-heçə də normal nəticədir.
- "İnter" bu mövsüm xeyli oyununu heç-heçə başa vurub...
- Qəbələyə qələbə üçün gəlmişdik. Amma üç xal qazanmaq mümkün olmadı. Bundan öncə "Sumqayıt", "Simurq" və AZAL-la oyunlarda da az xal itirməmişik.
- Baş məşqçinin texniki zonada yer ala bilməməsi çıxışınıza təsir göstərir?
- Bəli, çox. Amma o, bizi tribunadan izləyir və öz göstərişlərini verir.