Pavel Kapsa: Simurqun ilk üçlüyə düşmək şansı var
"Simurq"un polşalı qapıçısı Pavel Kapsanın azerisport.az saytına müsahibəsi
- Türkiyə toplanışı necə keçdi?
- Fikrimcə, yaxşı hazırlıq mərhələsi keçə bildik. Xeyli yoxlama oyunu keçirdik. Zədəsiz ötüşməyimiz də çox vacibdir.
- "Simurq"un hazırda daha da gücləndiyini demək olar?
- İndi bunu sizə deyə bilmərəm. Sadəcə, onu deməliyəm ki, hazırda komandada böyük rəqabət var. Nə dərəcədə gücləndiyimizi isə Premyer Liqa oyunları göstərəcək. Amma yenə də komandanın gücləndiyi qənaətindəyəm.
- Toplanış zamanı Almaniya "Duysburq"u (1:4) ilə Qazaxıstan "İrtış"ına (0:3) böyük hesabla uduzmağınıza nə səbəb oldu?
- Buna çox da böyük önəm verməyin tərəfdarı deyiləm. Həmin rəqiblərlə sadəcə, yoxlama görüşü keçirmişik. Yorğunluq fonunda oynayırdıq, heyəti yoxlayırdıq. Əks halda elə məğlubiyyətlərlə üzləşməzdik.
- Amma "Simurq"un çox qol vuraxması narahatlıq yaradır. Öz oyun formanızdan razısınız?
- Komanda üzvləri kimi, mən də yaxşı hazırlaşmışam. Buraxılan qolları da müzakirə etmişik. "Simurq"un qapısında problem olmayacaq.
- Yeni transferlər - Xuan Alvardo və Elnur Abdullayev barədə nə deyə bilərsiniz?
- Elnuru "Xəzər Lənkəran"dan tanıyıram. O, bizə qarşı bir neçə dəfə oynayıb. Səviyyəli yarımmüdafiəçidir. Xuanın da səviyyəsinə şübhə etmirəm. Yaxşı transferlərdir.
- Sizcə, bu iki oyunçu "Simurq"u gücləndirməyə yetəcək?
- Bizim onsuz da yaxşı oyunçularımız çox idi. Fikrimcə, yetərli olacaq. Amma hələ transfer pəncərəsi bağlanmayıb. Mümkündür ki, yeni transferlər də olsun.
- Ən yaxın izləyiciniz - "Xəzər Lənkəran"ın iddiasının kiçilməsi sizə sərf edə bilər?
- Düşünmürəm ki, bu, bizim işimizi asanlaşdıracaq. Lənkəranlıların sağa-sola xal paylayacağını da düşünmürəm. İlk 2-3 tur çox vacib əhəmiyyət daşıyır. Birinci oyunumuz elə "Xəzər Lənkəran"a qarşı olacaq, ondan sonra "Neftçi" ilə oynayacağıq. Bu oyunlarda inamlı çıxış etməliyik ki, sonrakı görüşlərdə də uğur qazana bilək.
- Mütəxəssislər "Qarabağ"a, "İnter"ə və "Neftçi"yə daha böyük ümidlər bəsləyirlər. Bəs siz "Simurq"un ilk üçlüyə düşmək şanslarını necə qiymətləndirirsiniz?
- İlk turlardan qələbə qazanmağa başlasaq, mütəxəssislərin fikrini dəyişə bilərik. Bizim hələ ilk üçlüyə düşmək şanslarımız qalır.