Bədavi Hüseynov: Bizim yenidən qızıl medalları qazanmağımız çətin olacaq
"Qarabağ"ın müdafiəçisi Bədavi Hüseynovun azerisport.az saytına müsahibəsi
- Bolqarıstanın "Levski" klubuna böyük hesabla (0:3) uduzmağınızın səbəbi nədir?
- Matç bizim üçün çox uğursuz alındı. İki penaltini vura bilmədik. Top sadəcə, qapıya getmək istəmirdi. Xoşbəxtlikdən hazırda təlim-məşq toplanışındaydıq və çatışmazlıqları aradan qaldırmaq üçün çalışmalarımızı davam etdiririk.
- Qurban Qurbanov bu nəticəni necə qarşıladı?
- Normal. Bu, futboldur. Hərdən belə oyunlar da olur. Səhvlərimiz üzərində işləyəcəyik.
- Toplanışı necə qiymətləndirə bilərsiniz?
- Hər şey plan üzrə gedir. Öncə fiziki hazırlığa daha çox diqqət ayırırdıq, indi isə toplu çalışmalara üstünlük veririk. Üç yoxlama oyunu keçirmişik, qarşıda daha üç oyunumuz var. Qalan oyunlarda daha yaxşı futbol sərgiləyib, fevral ayına yaxşı formada getməliyik.
- Premyer Liqanın qalan hissəsində gərgin mübarizə olacağını düşünürsünüz?
- Əlbəttə. Ötən mövsüm qazandığımız uğuru bu mövsüm də təkrarlamaq çox çətin olacaq. Hər bir oyunda gərgin mübarizə olacağı şübhəsizdir.
- Bu mövsüm hansı hücumçular sizin üçün daha çox çətinlik yaradıb?
- Kimisə xüsusi fərqləndirməyəcəyəm. Çünki hər bir komandanın öz üstünlükləri var.
- İlin ən yaxşı oyunçusu komanda yoldaşınız Qara Qarayev oldu, siz isə ikinci oldunuz. Bunu necə qarşıladınız?
- Qaranı bir daha təbrik edirəm. O, birinci olmağa layiq idi. Yaxşı mövsüm keçirdi, bütün oyunlarda meydanda oldu. Özümə gəlincə, hətta adımı ilk üçlükdə görməyim də mənim üçün sürpriz oldu. Əlbəttə, bu, xoş idi. Bunda baş məşqçimizin də böyük xidməti var.
- Azərbaycan yığmasının yeni baş məşqçisi Robert Prosineçki ilə görüşdə nəyi müzakirə etdiniz?
- Prosineçki bizim qaldığımız otelə gəlmişdi. Bəzi oyunçularımızla, həmçinin mənimlə tanış oldu. Belə bir görüşün baş tutması çox xoş oldu. Amma bu, tam tanışlıq xarakterli idi. Hər şeyi yığmanın toplanışı zamanı müzakirə edəcəyik.