İbrahim Uzunca: Bakıdakı missiyam hələ bitməyib
"Bakı"nın baş məşqçisi İbrahim Uzuncanın azerisport.az saytına müsahibəsi
- Hazırlıq necə keçir?
- Necə bacardıqsa, elə də hazırlaşdıq. Komanda üçün əlimizdən gələni edirik. Qarşıdakı oyunu gözləyirik. Ölkə xaricinə getmək alınmadı. Bütün hazırlıq Bakıda baş tutdu. Baxaq, görək bundan nə alınacaq.
- Klubun hələ də futbolçulara borcu qalır?
- Borcların ödəniləcəyinə dair söz verilib. Gözləyirik. Buna baxmayaraq, boş da oturmuruq. Hazırlıq bardə düşünürük.
- Qarşıda "Qəbələ" kimi maliyyə problemi olmayan, səviyyəli futbolçulardan təşkil olunmuş rəqiblə oyun var. Komandanız bu rəqiblə oyunda problem yaşaya bilər?
- Meydana öz yetirmələrimizdən ibarət komanda ilə çıxacağıq. Çalışacağıq ki, oyunda sonra utanmayacağımız şəkildə mübarizə aparaq. Rəqibdən xal almağa, xarakter göstərməyə çalışacağıq.
- Bu qış Nurlan Novruzovun klub rəhbərliyi ilə münasibətləri ən çox müzakirə olunan məsələlərdən oldu. Bu söz-söhbət komandaya da təsir göstərir?
- Artıq bu barədə söhbətləri hər kəs unudub. Nurlan komandaya qayıdıb və bizimlə birgə məşq edir.
- Hazırda o, Premyer Liqanın ən yaxşı hücumçusu hesab olunur. Bu cür söhbətlər onun çıxışına təsir göstərməz ki?
- Ümid edirəm ki, bu, təsir göstərməyəcək və Nurlan qollar vurmağa davam edəcək. Novruzov kimi gəncləri yetişdirmək üçün çalışırıq. Biz onu itirməməliyik. O, hələ Azərbaycan futboluna çox fayda verəcək.
- Milinko Pantiçin "Bakı"ya qayıdacağı barədə söhbətlər dolaşır. Bu barədə eşitmisiniz?
- Xeyr, eşitməmişəm. Bunu şərh edə bilmərəm. Çünki mənə heç bir aidiyyatı yoxdur. Pantiç artıq bu klubda çalışıb. Klub rəhbərliyinin də istənilən qərarına hörmətlə yanaşırıq. İstənilən halda "Bakı"dan getməyəcəyəm. Artıq 7 ildir bu klubda çalışıram. Hesab edirəm ki, hələ buradakı missiyam başa çatmayıb.