Kamal Quliyev: Millimizin bu tsikldə kiməsə badalaq vuracağına əminəm
"Neftçala"nın baş məşqçisi Kamal Quliyevin azerisport.az saytına müsahibəsi
- Sizcə, Robert Prosineçki millimizdəki işinə Berti Foqtsdan daha ciddi yanaşır?
- Berti Foqtsun dövründəki altı il bizim üçün ikti oldu. O, plansız, proqramsız gəlmişdi. Əgər yığmaya məşqçi təyin olunursa, onun uşaq futbolundan tutmuş əsas komandaya qədər sistemi olmalıdır. Qus Hiddink Rusiya yığmasına baş məşqçi təyin olunanda aşağı yaş qruplarından ibarət komandalar da hollandlara tapşırıldı. Bu, plandır, layihədir. Foqtsun dövründə belə bir şey görmədik. İlin 12 ayının yarısını Almaniyada, yarısını burda keçirdi. Daha dəqiqi səfərlərdə. Klubları, gənclərdən ibarət komandaları izləmirdi. Amma Prosineçki bunu edir. Allah eləsin ki, bunun yığmaya faydası olsun. Böyük səylə çalışmağa başlayıb, klubların toplanışlarını izlədi, oyunlara baxırdı, məşqçilərlə, oyunçularla görüşür, fikir mübadiləsi aparır. Uşaq futbolu ilə də maraqlanır. Ən əsası da bəyan edib ki, ailəsi ilə birgə Bakıda yaşayacaq, uşaqları da burada təhsil alacaq.
- Bu tsikldə yığmamızın möcüzəyə imza atmasına inam yoxdur. Buna rəğmən, xorvatdan nəsə gözləməyə dəyər?
- Bu seçmə mərhələdən nəsə gözləməyə dəyməz. Amma bu tsikl yığmamıza çox şey verə bilər. Məsələn, Prosineçki heç nədən çəkinmədən komandada eksperimentlər apara bilər. Ona növbəti tsikl üçün komanda formalaşdırmaq lazımdır.
- Prosineçki Xorvatiya ilə ikinci oyunun tam fərqli olacağını deyib...
- O, özü də xorvatdır və ölkəsinin futbolunu yaxşı bilir. Biz onsuz da hər tsikldə bir komandaya badalaq vururuq. Əminəm ki, bu dəfə də bacaracağıq.
- Sizcə, yaxşı komanda yaratmaq üçün indidən gənclərə üstünlük verməlidir, yoxsa gənclərlə təcrübəlilərin sintezini təşkil etmək lazımdır?
- Perspektivli gənclər yığmaya lazımdır. Amma onların yanında 3-4 təcrübəli futbolçu da olmalıdır. Hərdən elə olur ki, meydanda nəyisə sürət və güc yox, təcrübə həll edir. Meydanda ağsaqqallar da olmalıdır.
- Millinin indiki kapitanı Rəşad Sadıqovu gələcəkdə kim əvəz edə bilər?
- Komandanın kapitanı qalan bütün futbolçular üçün böyük qardaş kimi olmalıdır. Hər kəs ona hörmət etməlidir. Ən əsası da liderlik keyfiyyətləri olmalıdır. Fikrimcə, Rəşaddan sonra kapitanlıq sarğısını Kamran Ağayevə versələr, daha yaxşı olar.
- "Qarabağ"ın Türkiyə toplanışındakı yoxlama oyunlarında uğursuz çıxışını necə qiymətləndirə bilərsiniz?
- "Qarabağ" hazırda Azərbaycanın ən yaxşı klubudur. Yoxlama oyunlarındakı nəticələrə də çox önəm vermək lazım deyil. Futbolçular meydana yorğun çıxa bilər, çünki toplanışdadırlar. Bu da normaldır. Əsas komandanın sərgilədiyi oyundur. Səviyyəni saxlamaq lazımdır. Həm də unutmayaq ki, rəsmi oyunlarla yoxlama görüşləri tamamilə fərqli olur.
- Premyer Liqada qış çempionu "Qarabağ", birinci divizionda isə "Neftçala" oldu. Bu komandalar mövsümü də ilk pillədə başa vura biləcək?
- Ağdamlılar hazırda dorudan da çox yaxşı futbol sərgiləyirlər. Digər klublarımız da çempion olmağa çalışırlar. Belə oynamağa davam etsələr, onların yenidən çempion olması mümkündür. "Neftçala"ya gəlincə, tezliklə ikinci dövrəyə start verəcəyik. Hədəfimiz liderliyi qorumaqdır. Buna nail olacaq gücdəyik. Ümid edirəm ki, ikinci dövrə birinci dövrədən daha yaxşı alınacaq.