Təvəkkül Məmmədov: Aqil Məmmədov dedi ki, mənim adıma ləkə vurmusan
"Sumqayıt"ın futbolçusu Təvəkkül Məmmədovun azerisport.az saytına müsahibəsi
- “Sumqyaıt”a qayıtmaqla hər şeyin düzələcəyini gözləyirdin?
- Bir-birimizi başa düşmədik və mən çıxdım getdim Krasnodara. Sonradan dedilər ki, gəl, hər şey yaxşı olacaq. Dedilər bir aylıq maaşını kəsəcəyik və əvəzedici komandada oynayacaqsan. Ailəm də məsləhət gördü ki, qayıdam. Gəldim və 3250 dollar maaşımı cəza kimi kəsdilər. İndi də təzə şey çıxarıblar ki, maaşın 1000 manat olacaq. Məndə AFFA və FİFA müqaviləsi var. Alacağım maaşın miqdarı da orada görünür. Mən bununla razı deyiləm. Deyirlər getmək istəyirsənsə, 25 min dolları stolun üstünə qoy, azad agent kimi get. Mən deyirəm yaxşı, qalıram. Deyirlər 1000 manaa oynayacaqsan. Necə haqqımı yeyə bilərlər ki?
- Səbəb kimi nə göstərirlər?
- Getməyimə görə cəza verəcəkdilər, verdilər, əvəzedici komandada məşq etdim. İndi də deyirlər ki, guya bu da əlavə cərimədir. Müqaviləmdə 3250 dollar yazılıb. Gələn il üçün isə 4250 dollara oynayacağam. Bunlar isə indi deyir, ilyarım 1000 manata oynayacaqsan.
- İndi nə edəcəksən?
- AFFA-ya şikayət yazmışam. Görək necə olur. Mən istəyirəm sənədlərimi versinlər. Qarşıdakı ayların pulunu istəmirəm, onların bir manatı da mənə lazım deyil. Sadəcə, futbol oynamağıma mane olmasınlar.
- AFFA-dan kiminlə görüşdün?
- Rəmiş Malıyevlə görüşdük. Nə lazım idi, yazdıq, verdik.
- Düzələcək?
- Dedilər bir aya düzələcək. Düzəlməsə, FİFA-ya şikayət yazacağıq.
- Klub prezidenti ilə görüşmüsünüz?
- Dörd gündür böyük qardaşım mənə görə narahatdır, gəlib Bakıya. Krasnodarda işlərini atıb gəlib mənə görə. Prezidentə 4 gündür zəng edir, cavab vermir. Menecerə verib telefonu. Ceyhun da gah deyir evini su basıb, gah başqa şey deyir. Axırda görüşdük və yekun söhbətimiz oldu. Axırıncı söhbət budur ki, 3250 dollar idi maaş, cərimələndim 1000 manat alacağam. Getmək də istəyirsənsə, 25 min dollar ver, get.
- Halbuki komandaya gəlməyində Kamran Quliyev əsas rol oynayıb. Hər gün zəng edib səni çağırırdı...
- Kamran qardaşıma da yazıb ki, gəlsin hər şey düzələcək. Mən də ona görə gəlmişəm.
- Onda çağıranda aldadıblar səni?
- Demişdilər ki, yaxşı olacaq hər şey. İndi başqa söz deyirlər. Mən əvəzedici komandada məşq edirdim. Kamran Quliyev pəncərədən baxırdı.
- Krasnodara getməyin oynamamağınla bağlı idi, yoxsa bu söz-söhbətə görə getdin?
- Oynamamağımın bununla bağlılığı yoxdur. Mən deməmişəm ki, zəng gəlib və kiməsə “prikaz” ediblər. Oyundan qabaq adminstrator məni çölə çağırdı ki, baş məşqçi çağırır. Çıxdım çölə, mənə Aqil Məmmədov dedi ki, sən oynamalıydın, Orxan oynayacaq. Mən də dedim problem yoxdur, lap yaxşı. Gəldim paltarımı dəyişdim. Sabah da jurnalistlərdən biri zəng etdi və dedi sən oynamalıydın, niyə oynamadın? Mən də dedim baş məşqçim var və özü bilər, şans versə, oynayaram, verməz oynamaram. Hörmət edirəm qərarına.
- Yəni əsas inciklik bundan oldu?
- Bu söhbətdən sonra Aqil Məmmədov mənə zəng vurdu ki, hardasan? Dedim stadionda məşq edirəm. Gəldi stadiona və dedi ki, sən mənim adıma ləkə vurmusan. Mən də dedim heç nə etməmişəm. Deyir mənim haqqımda demisən zəng gəlib səni oynatmamışam. Mən də dedim elə söz deməmişəm. Yazılan kimi deməmişəm. Ondan sonra çıxdım getdim buradan. Burada qalmağın yeri yox idi. Halbuki, mən Azərbaycana milli komandada oynamaq üçün gəlmişdim. “Sumqayıt”da oynayıb milliyə yüksəlmək istəyirdim. Amma hər şey başqa cür oldu.
