Arif Daşdəmirov: Hələ millinin özünəinam hissinin geri qayıtdığını demək çətindir
Azərbaycan yığma komandasının və "İnter"in yarımmüdafiəçisi Arif Daşdəmirov azerisport.az saytına müsahibə verib. O, öncə Ukrayna "Şaxtyor"u ilə oyun barədə fikirlərini açıqlayıb:
"Yaxşı oyun alındı. Yeni baş məşqçinin rəhbərliyi altında ilk oyun idi. Fikrimcə, yaxşı təsir bağışladıq".
Müdafiəçinin sözlərinə görə, Donetsk təmsilçisi ilə görüşün nəticəsi əhəmiyyət daşımırmış: "Şaxtyor"un gücünü yaxşı bilirdik. Amma buna baxmayaraq, biz baş məşqçinin istədiyi kimi oynamağa çalışdıq. Mənə elə gəlir ki, bu, bizdə alındı".
"Oyunçular arasında anlaşma səviyyəsini yaxşılaşdırmaq istəyirdik. Çünki yeni futbolçular çox idi, fərqli taktika ilə oynayırdıq. Baş məşqçi oyunçuların necə çıxış etdiyini, bir-birini necə başa düşdüyünü görmək istəyirdi. Robert Prosineçki bizə hücum futbolu sərgiləməyi tapşırmışdı".
"Hələ komandanın özünəinam hissinin geri qayıtdığını demək çətindir. Bütövlükdə, toplanışdan və oyundan, komandadakı atmosferdən razı qaldım. Amma Malta ilə rəsmi oyuna çox az vaxt qalıb. Həmin oyunda daha yaxşı çıxış edib qələbə qazanmalıyıq".
Daşdəmirov klubdakı işlərinə də toxunub: "Çempionluq uğrunda mübarizə davam edir. Arada elə də böyük fərq yoxdur. Çünki bizim qarşıda liderlə iki oyunumuz var. Əgər onları məğlub etsək, xal fərqini xeyli azaltmış olacağıq".
Arif komandasının tez-tez heç-heçə etdiyini də dilə gətirib: "Heç-heçələrimiz doğrudan da çoxdur. Həmin oyunlarda xeyli xal itirmişik. Qarşıda "Simurq"la oyun var. Növbəti oyunlarda mütləq qələbə qazanmalıyıq".