Məhəmməd Mirzəbəyov: Milli komandanı Şaxtyorla müqayisə etməyə dəyməz
Azərbaycan yığmasının müdafiəçisi Məhəmməd Mirzəbəyovun azerisport.az saytına müsahibəsi
- "Simurq"la növbəti oyun öncəsi yenə ənənəvi söhbətlər meydana çıxıb...
- Bizim kimi, rəqib də qələbə qazanmağa çalışacaq. Qalan hər şey boş söhbətlərdir. Biz çempionluq uğrunda mübarizə aparırıq. "Simurq" isə avrokuboklara vəsiqə qazanmağa çalışır. Hər iki komandaya üç xal lazımdır. Belə söhbətlər isə həmişə olub, olacaq.
- "İnter"də yeni məşqçi peyda oldu. Marino Pusiçin Kaxaber Sxadadzedən sonra bu komandanın yeni baş məşqçisi olacağı bildirilir...
- Mən bu barədə heç nə bilmirəm. Hazırda komandanın baş məşqçisi Sxadadzedir.
- Yığmamızın Ukrayna "Şaxtyor"u ilə yoxlama matçı barədə nə deyə bilərsiniz?
- Fikrimcə, belə güclü rəqibə qarşı çox yaxşı oynadıq.
- Heyətdə çoxlu yeni futbolçu var idi. Komanda yoldaşlarınızı başa düşmək çətin deyildi?
- Xeyr, biz bir-birimizi yaxşı başa düşürdük. "Şaxtyor" güclü rəqibdi. Sadəcə, bu baxımdan rəqibə qarşı mübarizə aparmaq çətin idi. Amma hesab edirəm ki, biz onlara qarşı layiqli mübarizə apara bildik. Əlbəttə, uduzduğumuza görə təəssüflənirəm. Amma bütövlükdə yaxşı oyun alındı.
- Deməli, komandaların səviyyəsi hesabda da özünü göstərdi?
- Əlbəttə. "Şaxtyor" Almaniyanın "Bavariya" klubu ilə çəkişir. Ona görə onların səviyyəsini yığmamızla müqayisə etmək belə yersizdir.
- Onların vurduğu qollar da səviyyə fərqinin göstəricisi idi...
- Əgər cərimə zərbəsindən sonra vurulan qolu nəzərdə tutursunuzsa, çox dəqiq alındı. Amma biz də mübarizə apardıq, qol vurduq. Namiq Ələsgərov da gözəl qol vurdu. Özü də yaxşı hücumdan sonra. Başqa hücumlarımız da oldu. İkinci qolu da vura bilərdik. Amma bir qol vurmağımız da yaxşı göstəricidir. "Şaxtyor" çox güclü komandadır, onlara qol vurmaq çətin olsa da, biz bacardıq.
- Robert Prosineçki nə dedi?
- Fikrimcə, o, oyundan razıqaldı. Mənim oyunumla bağlı xüsusi heç nə demədi. Amma bütövlükdə komandamızın yaxşı oynadığını söylədi. Prosineçki heç kimlə ayrıca danışmadı.