Ruslan Qurbanov: Yığma komandada yeni dönəm başlayır
Azərbaycan millisinin və Xorvatiyanın "Hayduk" klubunun futbolçusu Ruslan Qurbanov yığmamızın Malta üzərində qələbəsi, millidəki debütü barədə azərisport.az saytının suallarına cavab verib.
- Malta ilə oyun barədə fikirlərinizi eşitmək maraqlı olardı...
- Bu oyunda qələbə qazanmaq istəyirdik. Ardıcıl dörd matçda məğlubiyyətdən sonra qələbə çox vacib idi. Malta asan rəqib deyil. Bununla belə bu gün millimizin rəqibdən güclü olduğunu və layiqli qələbə qazandığını düşünürəm. Biz rəqibdən üstün oyun sərgilədik. Qələbə qazandığımıza görə çox sevinirəm.
- Bu oyunda debüt edəcəyini gözləyirdin?
- Əslində meydana çıxacağımı gözləmirdim. Baş məşqçi Robert Prosineçki oyundan əvvəl klubunda oynamayana şans verməyəcəyini demişdi. Prosineçkiylə tam razıyam. Sadəcə, klubdakı son oyunlarda oynamadığıma görə Maltayla start heyətdə olmadığımı təbii qarşıladım. Sonradan məni meydana buraxanda ümidləri doğrultmağa çalışdım. Sevinirəm ki, debüt etdiyim görüşdə qələbə qazandıq.
- İkinci hissədə Malta təhlükəli vəziyyətlər yarada bildi. Bu o deməkdir ki, futbolçular yorulmuşdu, çünki, rəqib hesabı bərabərləşdirməyə yaxın idi...
- Rəqib üstünlük qazanmadı. Sadəcə, biz daha çox topa sahib çıxmışdıq. Onlara topa nəzarət etməyə imkan vermirdik. Bəzi epizodlarda topu itirəndən sonra Malta dərhal hücuma keçirdi. Əlbəttə, bərabərlik qolunu vurmaq istəyirdilər. Bununla belə biz onlardan daha yaxşı oynadıq, hətta hesab daha böyük ola bilərdi.
- Azərbaycan güclü oynadı, yoxsa Malta çox zəif idi?
- Azərbaycan yığmasında yeni dönəm başlayır. Oyundan oyuna artırmaq lazımdır. Ardıcıl dörd oyundan sonra azarkeşlər bizdən inciyib. Hiss olunur ki, azarkeşlər həmin məğlubiyyətləri unutmayıb. Onları daşa düşmək olar. Bu gün çalışdıq azarkeşləri sevindirək. Növbəti oyuna daha yaxşı hazırlaşmalıyıq. Çünki, Norveç daha güclü rəqibdir.
- Meydanda özünü necə hiss edirdin?
- Millidə oynamaq böyük şərəfdir. Sözsüz çalışırdım komanda yoldaşlarıma kömək olum. Oyunuma qiyməti məşqçi verəcək. Çalışdım səhvlərim az olsun. Anlaşmada məncə, heç bir problem olmadı.
- Klubda işlərin necə gedir?
- "Hayduk"da özümü doğrultmağa çalışıram. Son oyunlarda o qədər çox oynamasam belə, həvəsdən düşmürəm. Baş məşqçi mənə şans verəcəyini deyib. Məşqlərdə səylə çalışıram və öz vaxtımı gözləyirəm.
- Yeni komandana artıq öyrəşmisən?
- Xorvatiya çempionatı çox maraqlıdır. Üstəlik komandamda güclü rəqabət var. "Hayduk"da oynamaq karyeram üçün çox vacibdir. Ümidləri doğruldacağıma inanıram. Heç bir problem yoxdur. Komanda yoldaşlarım mənə çox yaxşı münasibət bəsləyir. Başa düşürəm ki, "Hayduk"da Azərbaycanı yaxşı təmsil etməliyəm.