Conatan Karuana: Bakıda erkən qol buraxmasaydıq, daha yaxşı oynayardıq
Malta millisinin futbolçusu Conatan Karuana Azərbaycan millisiylə AÇ-2016-nın seçmə mərhələsi çərçivəsində keçirilən oyundan sonra azərisport.az saytının suallarına cavab verib.
- Öncə Azərbaycan - Malta oyunu haqda fikirlərinizi bilmək maraqlı olardı?
- Hər şey aydın görünürdü. Hər iki komanda yaxşı oynadı. Bizim səhvlərimiz çox oldu. Ona görə də uduzduq. Azərbaycan millisi yaxşı futbolçulardan formalaşıb. Yaxşı oynadılar və qələbə qazandılar. Hərçənd ikinci hissədə yaratdığımız qol vəziyyətlərindən yararlansaydıq, matç tam başqa hesabla yekunlaşa bilərdi. Bizim məqsədimiz Bakıdan heç olmasa 1 xal aparmaq idi, təəssüf ki, istəyimizə çatmadıq.
- Deməli əsas məqsədiniz heç-heçə oynamaq idi?
- Biz yaxşı oyun sərgiləmək istəyirdik. Amma heç-heçə olsaydı belə, yaxşı nəticə hesab ediləcəkdi. Hər halda biz səfərdə oynayırdıq.
- Azərbaycan sizdən daha yaxşı oynadı, razısanmı?
- Qalib mühakimə olunmur. Erkən qol komandamıza pis təsir etdi. Əgər 4-cü dəqiqədə qol buraxmasaydıq, fərqli mübarizə, yəqin ki, fərqli nəticə olacaqdı.
- Azərbaycan millisinin oyunu haqda nə deyə bilərsən?
- Yaxşı mübarizə göstərdiniz. İlk qolu yaxşı hücumla yaratdınız. Həmin qolun ötürməsi və zərbəsi yaxşı alındı. Futbolçularınız orta xəttdə inamlı təsir bağışlayırdılar. Komandanızın oyunu xoşuma gəldi. İlk hissədə bir qədər aqressiv görsənirdi. Bununla belə layiqli qələbə idi. Biz yaxşı oyunumuzu göstərə bilmədik. Evdə oynamağınız sizə kömək oldu.
- Deməli, cavab matçında qələbə qazanmaq istəyəcəksiniz?
- Evdəki oyuna hələ çox vaxt var. Həmin oyunda müsbət nəticə bizim üçün vacib olacaq. O zaman daha yaxşı oynamalıyıq.
- Bir neçə gün əvvəl Gürcüstanla yoldaşlıq matçında iştirak etdiniz. Azərbaycanla Gürcüstanı müqayisə edə bilərsiniz?
- Yoldaşlıq oyunuyla rəsmi matç fərqlənir. Gürcüstan komandasında da yaxşı futbolçular var. Biz onlarla daha yaxşı oynadıq. Fikrimcə Gürcüstanla görüşümüzün yorğunluğunu çıxara bilmədiyimizə görə Bakıda uduzduq. Azərbaycanla Gürcüstan təxminən bərabər səviyyəli komandalardı.