Fəhmin Muradbəyli: Xalsız qayıtmaq istəmirik
Azərbaycanın U-19 yığma komandasının üzvü Fəhmin Muradbəylinin azerisport.az saytına müsahibəsi
- Elit mərhələnin ilk iki oyununda Fransa və İngiltərəyə niyə uduzdunuz?
- Çox çətin qrupda yer almışıq. Fransa və İngiltərə kimi güclü rəqiblərlə bir qrupda oynamalı olduq. Amma biz rəqiblərimizdən qorxmurduq, öz gücümüzə inanırdıq. Nəyə qadir olduğumuzu bilirdik. Bütün gücümüzü meydanda qoyduq. Mənə elə gəlir ki, komanda oyunu sərgiləməyi bacardıq. Baxmayaraq ki, əsas diqqəti əks-hücumlara yönəltmişdik. Belə rəqiblərə qarşı başqa taktika ilə oynamaq olmazdı.
- Demək olar ki, bu oyunlarda səviyyə fərqi sözünü dedi?
- Bizim Fransa ilə oyunda yüz faizlik qol vəziyyətimiz olsa da, yararlana bilmədik. Əvəzində öz qapımızda iki top gördük. Onların "Yuventus", "Çelsi", "Mançester Siti" kimi klublarda çıxış edən futbolçuları var. Həm də biz onlara qarşı əsl kişi kimi mübarizə apardıq. İngiltərəyə də qalib gələ bilərdik. Amma həmin oyunda da yaxşı şanslar olmasına rəğmən, yararlanmadıq. Bu üzdən xal qazana bilməmişik.
- Ümidləri doğrultmadığınızı indidən demək olar?
- Bizi nəyə ümid edəcəyimizi bilirdik. Amma çox təəssüf ki, siz oyunlarımızı görməmisiniz. Siz uşaqların necə mübarizə apardığını görərdiniz. Son saniyələrə qədər mübarizə aparmışıq.
- Son turda Danimarka üzərində qələbə qazanmaq şansınız var?
- Biz xalsız qayıtmaq istəmirik. Danimarkalılara qalib gəlmək istəyirik. Əminəm ki, biz buna nail olacaq gücdəyik.