Elnur Abdullayev: Simurq avrokuboklara vəsiqə qazana bilər
"Simurq"un yarımmüdafiəçisi Elnur Abdullayevin azerisport.az saytına müsahibəsi
- Son dövrlər "Simurq"la bağlı müxtəlif informasiyalar dolaşır, guya klubun gələcəyi sual altındadır. Siz bu barədə nə bilirsiniz?
- Hazırda Zaqataladayıq, qarşıdakı oyuna hazırlaşırıq. Düzünü deyim ki, mən bu barədə heç nə bilmirəm. Elə bir şey olsaydı, bizə nəsə deyərdilər. Ümid edirəm ki, hər şey yaxşı olacaq.
- Belə xəbərlər düz olsa da, olmasa da, komandaya yəqin ki, təsirsiz ötüşmür...
- Əlbəttə, təsiri ola bilər. Amma biz hamımız peşəkarlarıq və məşqlərimizi davam etdiririk. Yenə də deyirəm ki, elə bir şey olsaydı, bizə xəbər edərdilər.
- "Simurq" hazırda beşinci pillədə qərarlaşıb və dördüncü yerdə qərarlaşan "Qəbələ"dən iki xal geri qalır...
- Onlar bizi qabaqlasa da, öz aramızda oyunumuz qalır. Ona görə də qarşıdakı turlarda hər şey ola bilər. Bizim avrokuboklara vəsiqə qazanmaq şansımız qalır. Hər şey öz əlimizdədir.
- Qarşıda sizi AZAL-la oyun gözləyir. Onlar da sizdən bir xal geri qalırlar...
- Bizi çox çətin oyun gözləyir. Ona görə ki, bu komanda çox uğurlu mövsüm keçirir. Bu görüşdə 3 xalı qazanmaq bizim üçün çox vacibdir. AZAL-la oyuna ciddi hazırlaşmışıq.
- Bakılılara qarşı necə oynayacağınızı bilirsiniz?
- Ancaq onu bilirəm ki, bu komanda sonadək oynamağı bacarır.
- İki cəbhədə də mübarizəni davam etdirirsiniz. Bəs hansı sizin üçün prioritet sayıla bilər?
- Hər iki turnir. Çünki Avropa Liqasına həm kubok, həm də çempionatdan vəsiqə qazanmaq şansımız qalmaqdadır.
- Kubokun yarımfinalında "Qarabağ"la qarşılaşacaqsınız. Rəqibin kimliyini nəzərə alsaq, finala çıxmağınız nə dərəcədə realdır?
- "Qarabağ" hazırda çox baxımlı futbol sərgiləyir. Amma kubok oyunları iki matçdan ibarət olur. Hər şeyə həmin oyunlarda aydınlıq gələcək. Finala çıxmaq üçün bütün gücümüzü sərf edəcəyik.