Maksim Medvedev: Finalın Qəbələdə yox, Bakcell Arenada keçirilməsini istərdim
"Qarabağ"ın müdafiəçisi Maksim Medvedevin azerisport.az saytına müsahibəsi
- "Simurq"la oyunu necə şərh edə bilərsiniz?
- Çətin oyun oldu. "Simurq" üçün bu, Avropa Liqasına vəsiqə qazanmaq baxımından son şans idi. Demək olar ki, biz onları bu şansdan məhrum etdik. Şadam ki, finala yüksəldik.
- "Qarabağ"ın daha çox qol buraxmamaq haqda düşündüyünü demək olar?
- Oyundan öncə baş məşqçi qələbəyə oynamağı tapşırmışdı. Çünki heç-heçəyə oynayacağımız halda hər an qol buraxmaq təhlükəsi olacaqdı. Bu üzdən qol vurmağa çalışırdıq. Bizim kifayət qədər təcrübəli futbolçularımız var və onlar matçın tempini nə vaxt aşağı salacaqlarını, nə vaxt artıracaqlarını yaxşı bilirlər. Qol buraxmamağımız da yaxşı oldu.
- "Simurq" iddia edir ki, onların təmiz qolu hesaba alınmayıb...
- Onların belə bir hüququ var. Necə ki, biz də Milan "İnter"i ilə oyundakı təmiz qolumuzun qeydə alınmamasına etiraz edirdik. Lakin artıq hər şey geridə qalıb.
- Bəs siz nə düşünürsünüz?
- Düzünü desəm, həmin epizodda oyundankənar vəziyyət olduğunu düşünürəm. Oyundan sonra bir neçə dəfə təkrara baxdım. Samir Zərgərov ötürmə zamanı topa toxunuş edir. Oyundankənar vəziyyətə də düşən məhz odur. Əgər Zərgərov olmasaydı, Draqan Çeranın qoli qaydalar çərçivəsində vurulduğundan sayılacaqdı. Bunu təkrara baxdıqdan sonra müəyyənləşdirdim. Amma oyun zamanı elə bilirdim ki, təmiz qoldur.
- İstənilən halda "Qarabağ" finalda "Neftçi" ilə qarşılaşacaq...
- Hazırlaşacağıq. Qələbə qazanmaq istəyirik. Bizim kubokla bağlı böyük istəyimiz var.
- Oyunun Qəbələdə keçirilməsi ilə bağlı nə deyə bilərsiniz?
- Buna sevinmədim. "Bakcell Arena"da keçirilməsi daha yaxşı olardı. Toplanıb, Qəbələyə getməli olacağıq. Mövsümün sonunda bu, çox yorucu olur. "Bakcell Arena" "Neftçi"nin doğma stadionu olsa da, onlarla bu arenada məmnuniyyətlə oynamaq istərdim.
- Elə növbəti turda sizi "Neftçi" ilə çempionat oyunu da gözləyir...
- Bizim kimi, rəqibimiz də kubok oyunundan sonra yorğun olacaq. Hər iki komanda süni örtüklü meydanda oynayıb. Şanslar bərabərdir. Əla qarşılaşma olacaq. Turnir cədvəli baxımından da bu görüş bizim üçün çox vacibdir.
- Yeri gəlmişkən, "Qəbələ"nin futbolçularından onların Avropa Liqasına yolunu açdığınız üçün sizə təşəkkür edən olmayıb?
- (gülür) Hələ heç kim zəng etməyib. Oyundan öncə Ruslan Abışov bizə azarkeşlik edəcəyini demişdi. Amma "Simurq" nəzəri baxımdan hələ də dördüncü yeri tuta bilər. Amma real baxsaq, çempionatın son turlarında uğurlu çıxış edən "Qəbələ"nin avrokuboklarda oynayacağı məlumdur.