Denis Silva: Qarabağla kubok və çempionat oyunları tam fərqli olacaq
"Neftçi"nin müdafiəçisi Denis Silvanın azerisport.az saytına müsahibəsi
- "Neftçi" "İnter"ə cavab yarımfinal oyununda uduzsa da, finala çıxmağı bacardı. Matçla bağlı fikirlərinizi bilmək istərdik...
- Bizim hər oyunumuz çətin alınır. Süni örtüklü meydan da əlavə çətinlik yaradırdı. Amma biz uğur qazanmaq üçün bütün gücümüzü qoyduq. Nəticədə, finala çıxmağı bacardıq. "İnter"in qol vurmaq üçün daha çox şansı oldu. Amma biz ümumi nəticədə üstün olmağı bacardıq.
- "Neftçi"nin ikinci hissədə bəxtinin gətirdiyini demək olar?
- Demək olar. Onlar hücum edirdilər. Biz də dayanmadıq, sonadək mübarizəni davam etdirdik. Bizim üçün finala çıxmaq çox vacib idi. Buna da nail olduq.
- Komandanızın fasilədən sonra belə zəif çıxış etməsinin səbəbi nədir?
- Əsas nəticədir. Başa düşürdük ki, irəli atılsaq, baxımlı futbol oynamağa çalışsaq, müdafiə xəttimiz üçün problemlər arta bilər. Ona görə də hamımız arxa xəttə kömək etməyə çalışırdıq.
- Finaldakı rəqibiniz "Qarabağ"dır...
- Final oyununa hələ çox vaxt var. İndidən bu görüşü müzakirə etmək tezdir. Qarşıda vacib çempionat oyunları var. Onlara köklənmək lazımdır. İstənilən halda finalda bizi gərgin oyun gözlədiyi məlumdur. "Qarabağ" çox güclü komandadır.
- Qarşıdakı çempionat oyununuz da bu komandaya qarşı olacaq. Bu matçı final öncəsi məşq saymaq olar?
- Xeyr, final tam fərqli olacaq. Orada başqa emosiyalar olur.