Məhəmməd Mirzəbəyov: Neftçi və Qəbələ İnterə çata bilər
"İnter"in müdafiəçisi Məhəmməd Mirzəbəyovun azerisport.az saytına müsahibəsi
- "Neftçi"yə qalib gəlsəniz də (2:1, ilk oyun 0:2) finala çıxa bilmədiniz...
- Çoxlu qol vəziyyətini boşa verdik. Futbolda belə hallar olur. Görünür, belə qismət imiş.
- "Neftçi"nin bəxtinin gətirdiyini demək olar?
- Biz hər iki oyunda qol vura bilərdik. Amma birincidə şanslarımızdan ümumiyyətlə yararlana bilmədik. Cavab matçında isə daha çox qol vurmalıydıq. Təəssüf ki, cəmi iki dəfə fərqlənə bildik. "Neftçi" isə ələ düşən şanslarından maksimum yararlandı və buna görə də finala yüksəldi. Onlar qol epizodları zamanı çox inamlı çıxış etdilər.
- Finala çıxmaq üçün sizə nə çatmadı?
- Sadəcə, qol vəziyyətlərindən yararlana bilmədik. Dəqiqlik çatışmadı.
- "Neftçi"nin futbolçuları da etiraf etdilər ki, siz finala layiq idiniz və buna nail ola bilərdiniz...
- Onlar haqlıdırlar. Əks halda biz indi finalda olardıq. İstənilən halda həm "Neftçi"ni, həm də "Qarabağ"ı finala çıxması münasibətilə təbrik edirəm.
- Maraqlıdır ki, Zaqatalada da "Simurq" qələbəyə layiq olduğu halda, finala "Qarabağ" adladı. Belə çıxır ki, yarımfinalın ən yaxşı komandaları finaldan kənarda qaldı?
- Bir halda ki, "Qarabağ"la "Neftçi" finala yüksəlib, deməli, onlar buna layiqdirlər. Futbolda səhvlər qaçılmaz olur. Biz də insanıq, səhv etməyimiz mümkündür.
- Nikolas Kanales cavab oyununda qol vurmasaydı, hər şey fərqli ola bilərdi?
- Həmin qol olmasaydı, heç-heçə olacaqdı (gülür). Əlavə vaxtda kimin qalib gələcəyini isə heç kim deyə bilməz.
- "Qarabağ" - "Neftçi" finalı ilə bağlı nə deyə bilərsiniz?
- Şübhəsiz ki, maraqlı və gərgin mübarizə görəcəyik. Onların hansının qalib gələcəyini isə hakimin yekun fitindən sonra biləcəyik.
- Düşünmürsünüz ki, kubokdakı uğursuzluq sizə çempionatda da mane olsun və "Neftçi"ylə "Qəbələ"nin "İnter"i qabaqlamasına şərait yaratsın?
- Fikrimcə, hər şey yaxşı olacaq. "Neftçi" və "Qəbələ"nin bizi qabaqlaması riyazi baxımdan mümkündür. Eyni qayda ilə bizim də "Qarabağ"ı qabaqlamağımız mümkündür. Amma öncədən heç nə demək olmaz. Qarşıda altı oyun var. Fikrimcə, biz növbəti oyunlara həm fiziki, həm də psixoloji cəhətdən hazır ola biləcəyik.