Tahir Gözəl: Dneprin yerində biz olmalıydıq
"Qarabağ"ın vitse-prezidenti Tahir Gözəl Topaz Premyer Liqasının 35-ci turu çərçivəsində "İnter"ə qarşı keçirdikləri oyundan (1:2) sonra jurnalistlərin suallarını cavablandırıb. Azerisport.az sizi klub rəhbərinin açıqlamaları ilə tanış edir.
- Komandanızın növbəti çempionluğu barədə nə deyə bilərsiniz?
- Azərbaycan məlum yanğın hadisəsi və xeyli insanın həlak olması ilə əlaqədar heç də yaxşı günlərini yaşamır. Ona görə də bizim mükafatlandırma mərasimi belə ciddi keçdi. "Qarabağ" yenə böyük uğura imza atdı. Çempionluğu başqa cür adlandıra bilmərəm. Ümid edirəm ki, bu uğur azarkeşlər üçün çətin günləri yüngülləşdirmək baxımından müəyyən bir təsəlli oldu.
- Klubunuz bu mövsüm Avropa Liqasında Ukraynanın "Dnepr" klubuna səfərdə gələn yeganə komanda oldu. İndi isə həmin komanda finaldadır. "Qarabağ"dan yeni avrokuboklar mövsümündə nə gözləmək olar?
- Klub Avropada yeni uğurlar qazanmağa tamamilə hazırdır. Ötən il bizim heç bəxtimiz gətirmədi. Əks halda onların yerində indi biz olmalıydıq. Alınmadı. Hazırda daha təcrübəli komanda lmuşuq. İddialarımız da böyükdür və dəyişməz olaraq qalır.
- Komandaya yeni transfer olunan futbolçularla bağlı nə deyə bilərsiniz?
- Elvin Məmmədovla Coşqun Diniyevi transfer etmişik. Onların komandamızı gücləndirəcəyinə əminəm. Onlardan yaxşı oyun gözləyirəm. Bizimlə oyunda da Elvin yaxşı futbol sərgilədi.
- "Qarabağ" daha kimi istəyir?
- Mümkündür ki, bir və ya iki əcnəbi futbolçu dəvət edək. Transfer bazarında gərgin iş gedir.
- Qarşıda "Neftçi" ilə kubokun final matçı var...
- Səbrsizliklə həmin oyunu gözləyirik. "İnter"lə son oyunda elə də həyəcan yox idi. Çünki çempionluğu təmin etmişdik. Ona görə də uduzduq. Finalda isə tam fərqli olacaq. Mən özüm də həmin görüşü izləyənlər arasında olacağam.
- "Qarabağ" çempionluqla öz hədəfinə çatıb, ya kuboku da qazanmaq vacibdir?
- Biz kuboku da qazanmalıyıq. Rəqib "Neftçi"dir və bu, qarşılaşmanın prinsipiallığını daha da artırır. Bu, iki aslanın döyüşüdür və güclü olan qalib gələcək.