Böyükağa Hacıyev: Problem ondadır ki, Azərbaycan məşqçilərinə hörmət etmirlər
"Neftçi"nin sabiq baş məşqçisi Böyükağa Hacıyevin azerisport.az saytına müsahibəsi
- Sabiq komandanız məşqçi axtarışındadır. Deyilənə görə, klub əcnəbi məşqçiyə tapşırılacaq...
- Bu barədə məlumatım yoxdur. Ona görə şərh vermək istəməzdim. Yəqin klubun strategiyası bunu tələb edir. Biz indi klubdan kənardayıq, odur ki, orada çalışanlar problemi daha yaxşı başa düşər.
- Sizcə, Arif Əsədovu dəyişmək lazımdır?
- Əlbəttə, yox. Bu ölkədə iki titul var. "Neftçi" Azərbaycan Kubokunu qazansa, onu dəyişmək hörmətsizlik olacaq. Çünki, bu insan uğur qazanmış sayılacaq. İstənilən halda mövsümün yekun nəticəsini qənaətbəxş hesab edəcəklər. Əgər avrokuboklarda uğursuzluq olsa, onda o, özü gedəcək. Problem ondadır ki, Azərbaycan məşqçilərinə hörmət etmirlər.
- Niyə elə düşünürsünüz?
- Azərbaycan məşqçilərinə hörmət olunmur, fikrimdə əminəm. Yerli məşqçi ani uğursuzluq olan kimi istefanı hazırlayırlar. Əcnəbi isə ən azı 1-2 il yerini rahatlamalıdır. "Neftçi" deyirdi pulum yoxdur. İndi isə əcnəbi məşqçi axtarır. Bu nə dərəcədə düzgündür? Qoy xarici məşqçiyə verəcəyi pula yaxşı futbolçular alsın. Heyəti düzəltmək lazımdır, məşqçini dəyişmək yox.
- "Neftçi"nin problemi futbolçulardadır?
- Bu komandada bütün uğurlar yerli məşqçilərin adıyla bağlıdır. Gede, Petrjela hələ unudulmayıb. Onların dağıtdıqlarını güclü düzəltdik. Komanda indi mənə batan gəmini xatırladır. Bilirsiniz nə çatmır? Kapitan, gəmini idarə edən və irəliyə aparan kapitan lazımdır.
- Yuri Syominin namizədliyi müzakirə olunur. Sizcə, o, "Neftçi"ni uğura daşıya bilər?
- Onu zaman göstərəcək. Siz mənə deyin, Syomin nə qədər pula gələcək Bakıya? Hər halda az pula gəlməz. Rusiya çempionatından Azərbaycana yaxşı pula gələr. Düzdür?
- Yəqin belə olar. Maliyyə məsələsi açıqlanmır...
- Qoy o pula komandanın digər problemlərini düzəltsinlər. Heyəti gücləndirsinlər. Syomin bu heyətlə oynamayacaq. Niyə onda bizimkilər o şəraiti yaratmırlar?
- Eləcə də Hacı Hacıyevin adı namizədlər arasında var...
- 70 yaşında? Bunlar nə demək istəyir? Yəqin azarkeşlərə sürpriz hazırlayırlar. Məşqçi gətirəndə o adamın Azərbaycan futbolunda işləməyi bacaracağına əmin olmaq lazımdır. Yoxsa təcrübə aparmaq vaxtı deyil. Bəlkə "Neftçi"nin hədəfləri dəyişib. Ola bilər komandanın qarşısında başqa məqsədlər var. Hazırkı "Neftçi"nin qərarlarını anlamaq çətindir.
