Samir Əliyev: Neftçinin dişinə görə olan bir rəqiblə düşməyimizi istərdim
"Neftçi"nin baş məşqçisi Samir Əliyevin azerisport.az saytına müsahibəsi
- MTK ilə yoxlama oyununuz barədə nə deyə bilərsiniz?
- Bu oyun ərəfəsində cəmi bir məşqə çıxmışdıq. Həm fiziki, həm də taktiki məşq etmişdik. Uşaqlar hələ istirahətdən yenicə qayıdıblar. Ona görə də bu görüşə yaxşı hazırlaşdığımızı demək olmaz.
- İstənilən halda böyük hesabla uduzmağınız sizi məyus etmədi?
- Yoxlama oyunlarının nəticəsini bir kənara qoymaq lazımdır. Əsas odur ki, futbolçuların çalışqanlığını gördük. Heyətlə bağlı hələ problemlərimiz var. Xüsusilə də cinahlarda. Bunu dayaq yarımmüdafiəçisi mövqeyinə də aid etmək olar. Kaue cəzalı olduğundan ilk oyunu buraxmalı olacaq. Hücumda da problemimiz var. Məsələn, MTK ilə görüşdə əvəzedici heyətdən dəvət olunan Mirabdulla Abbasov 90 dəqiqə meydanda oldu. Halbuki, o, gəncdir, təcrübəsi yoxdur. 1997-ci il təvəllüdlü Kamran Nəcəfzadəyə də şans yaratdıq. Müdafiənin cinahlarında Kamal Qurbanovla Orxan Bəşirova şans yaratdıq. Hələlik, bu uşaqlarla hazırlaşırıq. Sabah Əziz Quliyev də gələcək. Bütövlükdə, pis oynamadıq. Gənclərin uyğunlaşması üçün zamana ehtiyac var. Amma MTK ilə oyunda özlərini yaxşı tərəfdən göstərdilər. Qol da vura bilərdik. Təcrübə çatışmazlığı buna mane oldu. Oyundan öncə də uşaqlara demişdim ki, bu, bir sınaq matçıdır, həyəcanlanmayın, səhvlər ola bilər. Doğrudan da səhvlərimizi görmək imkanı qazandıq.
- Braziliyalı Ayltonla bağlı nə deyə bilərsiniz
- Sabah o, tibbi müayinədən keçəcək. Böyük ehtimalla yaxın günlərdə onunla müqavilə bağlayacağıq.
- Kaue düşərgəyə qayıdıb. Bəs Flavinyo ilə Erik Ramosun aqibəti necə olacaq?
- Legionerlərdən ilk gündən bizimlə olan Kaue və Xuan Albertodur. İspaniyalı yeni transferimiz özünü yaxşı tərəfdən göstərdi. Amma onun növbəti oyunlarda necə çıxış edəcəyini zaman göstərəcək. Flavinyo ilə Ramos sabah komandaya qoşulacaq. Ramos da Kaue kimi cəzalıdır. Flavinyoya gəlincə, o, üç aydır məşq etmirdi və çox çətin olacaq.
- Julius Vobay, Ernest Nfor, Karlos Kardoso və Denis Silvanın da komandaya qayıtmaq ehtimalı var?
- Onlar artıq komandada deyil. Heyətimiz əsasən gənclərdən qurulub. Əvəzedici heyətdən beş futbolçu cəlb etmişik. 7-8 oyunçumuz 18-21 yaş aralığındadır.
- Belə heyətlə Avropa Liqasında uğur qazanmaq çətin olmayacaq?
- Əlbəttə, çətin olacaq. Amma bu gənclərə böyük ümidlər bəsləyirik. Çünki istedadlı gənclərimiz çoxdur. İstənilən halda onların komandamıza nə dərəcəd faydalı olacağını zaman göstərəcək.
- Kurban Berdıyevin "Neftçi"yə gələcəyi barədə xəbərlər sizin işinizə köklənməyinizə mane olmur?
- Mən belə mənasız və boş söhbətlərə baş qoşmaq istəmirəm. Belə xəbərlərə də diqqət vermirəm. Bizim əsas hədəfimiz qısa müddətdə yaxşı komanda formalaşdırmaqdır. Tam olaraq işimizə köklənmişik. Allah eləsin ki, Avroliqada uğurlu çıxış edək.
- İlk təsnifat mərhələsində hansı ölkələrin təmsilçiləri ilə qarşılaşmaq istərdiniz?
- Əlbəttə, ilk mərhələdə yaxşı rəqiblə qarşılaşmağı çox istərdik. Amma bu, bizim öz əlimizdə deyil. Hər şeyə püşkatma aydınlıq gətirəcək.
- "Neftçi" bundan sonra yeni transferlər edəcək?
- Artıq bir yeni transferimiz var - Xuan Alberto. O, mərkəz müdafiəçisidir, vaxtilə "Simurq"da da oynayıb. Şübhəsiz ki, yeni oyunçular da olacaq. İyunun 22-də püşkatmadır. Artıq UEFA-ya iştirak ərizəmizi də göndərməliyik. Klub rəhbərliyi hazırda bu işlə məşğuldur.
