Kamran Ağayev: Premyer Liqamıza və Kayserispora qayıtmağa hazırlaşmıram
Azərbaycan yığmasının qapıçısı Kamran Ağayevin azerisport.az saytına müsahibəsi
- Özünüzü necə hiss edirsiniz?
- Hər şey yaxşıdır. Son mövsüm yaxşı alındı. Azərbaycan yığmasının heyətində Oslodan heç-heçə ilə qayıtdıq. Yaxşı futbol göstərdik. Bütövlükdə, əhvalım yaxşıdır.
- Bəs növbəti mövsüm üçün planlarınız necədir?
- Hələ ki, fərdi şəkildə məşq edirəm. Azərbaycan yığmasının qapıçılarla iş üzrə məşqçisi Faiq Əzizovun tərtib etdiyi proqrama əsasən hazırlaşıram.
- Sizin yeni klubunuzun adını nə vaxt biləcəyik?
- Düzünü deyim ki, bütün işlərlə menecerim məşğul olur. Ona görə o, daha yaxşı xəbərdardır.
- Yenidən Azərbaycan Premyer Liqasında çıxış etməyiniz mümkündür?
- Buraya qayıtmağa hazırlaşmıram. Ən pis halda yenidən Türkiyənin PTT 1-ci liqasında çıxış edəcəyəm.
- "Kayserispor"la 1-ci liqanın çempionu oldunuz, Super Liqada oynamaq hüququ qazandınız. İndi bu komandada oynamağa nə əcəb layiq görülmürsünüz?
- Super Liqada oynamaq istəyərdim. Amma bu, təkliflərdən asılıdır.
- Bəlkə elə "Kayserispor"a qayıdasınız?
- Müəyyən səbəblərdən mənim ora qayıtmağım artıq mümkün deyil. Çünki bu klubla maliyyə məsələlərində problem vardı. Onların mənə borcu qalıb. Böyük ehtimalla bu həftə yeni klubum bəlli olacaq.