Mahmud Qurbanov: Bu gün Neftçidən böyük uğurlar gözləmək düzgün olmaz
Azərbaycan yığmasının məşqçisi Mahmud Qurbanov Avropa Liqasının birinci təsnifat mərhələsi çərçivəsində bu gün ilk oyunlarını keçirəcək təmsilçilərimizin şanslarını dəyərləndirib. Azerisport.az sizi həmin fikirlərlə tanış edir:
"Neftçi" - "Mladost" (Çernoqoriya)
"Neftçi"nin heyətində dəyişikliklər olub. Çoxlu futbolçu gedib, baş məşqçi dəyişib. Yenilər təcrübəsizdirlər, amma perspektivli futbolçulardır. Digər klublarda icarə əsasında çıxış edənlərdən də qayıdanlar var. Məncə, "Neftçi"yə ilk oyunda çətin olacaq. Çünki komandanın hazırlıq üçün də az vaxtı var idi. Bu gün "Neftçi"dən böyük uğurlar gözləmək düzgün olmaz. Amma bütün çətinliklərə baxmayaraq, komandamız "Mladost"u keçə bilər.
"Laçi" (Albaniya) – "İnter"
"İnter"in də baş məşqçisi, çoxlu futbolçusu gedib. Amma komandaya xeyli təcrübəli futbolçu gətirilib. Ona görə də bu klubun imkanı əvvəlki kimi olmasa da, heyəti güclüdür. Bu komandanın da hazırlıq üçün çox vaxtı yox idi. "İnter" heç digər klublarımızdan fərqli, ölkə xaricinə təlim-məşq toplanışına da getmədi. Oyunçular arasındakı anlaşma səviyyəsinin necəliyindən də xəbərimiz yoxdur. İstənilən halda təcrübənin sözünü deyəcəyinə inanıram. "Laçi" ilə qarşılaşmalar çətin olacaq. Amma bu komandanı keçmək olar".
"Dinamo" (Tiflis, Gürcüstan) - "Qəbələ"
"Dinamo"nun zəif komanda olduğunu deməzdim. Gürcü futbolçular həmişə öz texnikaları ilə fərqlənirlər. Amma "Qəbələ" Avroliqanın qrup mərhələsinə düşməyi hədəfləyibsə, "Dinamo"ya hər iki oyunda qalib gəlmək lazımdır. Bölgə klubu "İnter" və "Simurq"dan yaxşı oyunçular aldı. Komandanın avrokuboklarda böyük təcrübəsi olmasa da, heyətindəki oyunçuların kifayət qədər təcrübəli olduğunu demək olar. "Qəbələ"nin heyətində yığma üzvləri də var. Ona görə də komandadan qələbə gözləyirəm.
Bütövlükdə, klublarımızın hamısından uğurlu nəticə gözləyirəm. İnanmaq istərdim ki, qrup mərhələsində Azərbaycan təmsilçiləri də yer alacaq. Hər şey hazırlıq səviyyəsindən və rəqiblərin kimliyindən asılı olacaq.