Xəzər Lənkərana qarşıdakı 3 gündə 4 legioner qoşulacaq
Türkiyənin Kapadokya bölgəsində yeni mövsümün hazırlığını davam etdirən “Xəzər Lənkəran” toplanışın beşinci günündə də məşqlərini səhər və axşam olmaqla iki hissəyə bölüb. Azerisport.az xəbər verir ki, fiziki hazırlıq üzrə məşqçi Covanni Melkiorrenin rəhbərliyi altında müxtəlif fiziki təmrinləri və çalışmaları yerinə yetirən futbolçular axşam məşqində baş məşqçi Yunis Hüseynovun taktiki tapşırıqlarını yerinə yetirirlər.
Bu gün də daxil olmaqla qarşıdakı uc gündə komandanın düşərgəsinə dörd yeni futbolçunun gəlməsi gözlənilir. Qapıçı mövqeyi də daxil olmaqla yarımmüdafiəçi və hücumçu mövqeyini gücləndirmək üçün dəvət olunan futbolçular haqqında son qərarı baş məşqçi Yunis Hüseynov verəcək.
Bu arada “Xəzər Lənkəran”ın toplanış müddətində ilk sınaqçı rəqibi artıq bəllidir. Komanda iyulun 8-də Türkiyənin “Kayserispor” klubunun A2 komandası ilə qarşılaşacaq.