Ruslan Qurbanov: Mladostu da keçə bilməsək, kimi keçəcəyik?
"Neftçi"nin hücumçusu Ruslan Qurbanov Avropa Liqasının birinci təsnifat mərhələsi çərçivəsində Çernoqoriya "Mladost"una qarşı keçirdikləri oyundan (2:2) sonra azerisport.az saytının suallarını cavablandırıb.
- Oyun haqda nə deyə bilərsiniz?
- Pis oynamdıq. Amma iki adi qol buraxdıq. Halbuki, rəqib bundan başqa heç nə ilə yadda qalmadı. Sonda matçı qalib vurmağa sadəcə, güc çatmadı. Fikrimcə, ikinci qoldan sonra müdafiəyə daha çox diqqət ayırmalı idik. Amma biz yenə qol vurmağa çalışırdıq.
- Cavab oyununda nə olacaq?
- Səfərdə qalib gələcəyik. Özümüzə inanırıq. Toplanışda vaxtımız az oldu. Çünki komandaya yeni sistem tətbiq olunur. Bunun üçün isə vaxta ehtiyac var.
- "Neftçi" matçın sonunda çox yorğun görünürdü...
- Bəli, komanda yorulmuşdu. Amma biz ümidimizi itirmirik və səfərdə növbəti mərhələyə vəsiqə qaznacağımıza inanırıq. "Mladost"u da keçə bilməsək, kimi keçəcəyik?
- Bu komandanı keçə bilməməyiniz faciə sayıla bilər?
- Belə deməzdim. Hər bir komanda qalib də gələ bilər, uduza da. Amma biz azarkeşlərimizi, siz jurnalistləri sevindirməyə çalışacağıq. Biz özümüz də bunu çox istəyirik.
- Yəqin ki, rəqib də öz meydanında Bakıdakından daha yaxşı oynayacaq...
- Onlar daha çox qol buraxmamağa çalışacaqlar. Bizə isə mütləq qol vurmaq lazımdır. Buna borcluyuq. "Neftçi" əvvəllər də öz meydanında zəif oynayıb, amma rəqib meydanında qalib gələrək, mərhələ keçib. Gənc komandamız var. Bizə vaxt lazımdır. Gələcəkdə necə oynayacağımızı özünüz də görəcəksiniz.
- Klub rəhbərliyi oyundan sonra futbolçularla görüşdü?
- Mən rəhbərliyi oyundan sonra görmədim. Çünki çimməyə getmişdim.
- Bəs Samir Əliyev nə dedi?
- Sona qədər mübarizə apardığımıza görə hər birimizə təşəkkür etdi. Bildirdi ki, ciddi heç nə baş verməyib və növbəti mərhələyə vəsiqə qazanmaq üçün cavab oyunu da var.