"Əlimizdən gələni edirik ki, qazon Qarabağ - Seltik matçına tam hazır olsun"
"Əlimizdən gələni edəcəyik ki, Tofiq Bəhramov adına Respublika stadionu "Qarabağ" - "Seltik" matçına qədər tam hazır vəziyyətə gəlsin". Bunu azerisport.az saytına açıqlamasında Football and Sports Management Ltd. şirkətinin icraçı direktoru Fərman Əlizadə söyləyib.
Xəbər verdiyimiz kimi, avqustun 5-də mərkəzi arenada UEFA Çempionlar Liqasının üçüncü təsnifat mərhələsi çərçivəsində ölkə çempionu "Qarabağ" Şotlandiya "Seltik"i ilə cavab matçına çıxacaq. Amma oyuna günlər qalmış stadionun ot örtüyünün xeyli hissəsi korlanıb. Əməkdaşımız məhz bu məsələ ilə əlaqədar mərkəzi arenaya baş çəkib, qazona nəzarət edən FSM-in rəsmisi Fərman Əlizadə ilə söhbətləşib:
"Məlum olduğu kimi, yay başlayan kimi, ölkənin bütün stadionlarında qazonun yeni mövsümə hazılanması ilə bağlı işlər aparılır. Mərkəzi arenada bu işlərə vaxtında start verə bilmədik. Çünki arena məşğul idi. Amma buna baxmayaraq, şirkətimiz "Qarabağ"ın Çernoqoriya "Rudar"ı ilə ev oyununa qədər stadionu tam hazır vəziyyətə gətimək üçün əlində ngələni etdi. Sevindirici haldır ki, həmin vaxt arena UEFA inspektoru tərəfindən də yüksək qiymət aldı".
Şirkət rəsmisi qazonun təxminən 30 faizinin yararsız vəziyyətə düşməsinin səbəblərini belə izah edib: "Təəssüf ki, havaların son dövrlər həddən artıq isti keçməsi mərkəzi arenanın da qazonuna təsirsiz ötüşmədi. Son günlərdə Bakı şəhərində havanın hərarəti 39-40 dərəcədir. Belə olan halda, qazonda temperatur hətta 55 dərəcəyə qədər qalxır. Bu istilik meydançada bəzi virusların əmələ gəlməsinə səbəb olur. Bunun qarşısını almaq üçün biz bəzi işlər gördük və hazırda virusun qarşısını ala bilmişik. Belə şeylər təkcə Tofiq Bəhramov adına Respubilka stadionunda yox, “Bakcell Arena”da əvvələr olmuşdu. Lakin onda bizim vaxtımız çox idi deyə, bu virusların böyüməsinə imkan vermədik. İndi biz mərkəzi arenada mümkün ola biləcək bütün işləri aparmışıq və hazırda meydançanı bərpa etmək prossesindəyik. 2 gün öncə qazonun vəziyyəti indikindən də pis gündə idi. Mümkün olan hər bir işlər görülür. Hətta mütəxəssislərimiz gecə də işləyirlər".
Artıq arenadakı vəziyyətlə "Qarabağ" rəsmiləri də tanış olublar və şübhəsiz ki, gördükləri onları razı salmayıb. Amma FSM-in icraçı direktoru qazonu oyunadək hazır vəziyyətə gətirəcəklərini deyir: "İstənilən halda oyunu mərkəzi arenada yox, başqa stadionda keçirməkdən söhbət gedə bilməz. "Qarabağ"ın ÇL-in pley-off mərhələsinə vəsiqə qazanması üçün yaxşı şans var. Biz də əlimizdən gələni etməliyik ki, komandamız bu şansdan maksimum yararlansın. Qazonu mümkün qədər yaxşı vəziyyətə gətirmək üçün hər şeyi edəcəyik".
