Markel Susaeta: İnter Atletikə iki qol vura bilər, amma biz imkan versək
Avropa Liqasının üçüncü təsnifat mərhələsi çərçivəsində Bakı "İnter"i ilə mübarizə aparan İspaniyanın "Atletik" klubunun futbolçusu Markel Susaeta azerisport.az saytının suallarına cavab verib.
- İlk görüşdə "İnter" üzərində qələbə qazanmaq çətin olmadı. Rəqibdən belə oyun gözləyirdiniz?
- "İnter"in risk etməyəcəyini bilirdik. Komanda ilk dəqiqələrdən müdafiə futbolu oynamağa başladı. Start heyətdə 5 müdafiəçinin olması hər şeyi sübut edir. Rəqibi başa düşmək olar. Bilbaoda qazanılan heç-heçə onlar üçün böyük nəticə olacaqdı. Fikrimcə, "İnter" vətənə qolsuz bərabərliklə qayıtmaq istəyirdi.
- İki qol vurdunuz, demək olar ki, cütün taleyi həll olunub...
- Sizinlə razı deyiləm. Bakıda bizi çətin oyun gözləyir. Cavab görüşü süni örtüklü meydançada olacaq. Bu bizim üçün müəyyən problem yarada bilər. Bildiyiniz kimi, süni örtükdə futbolçu tez yorulur. Zədə almaq ehtimalı yüksəkdir.
- Bakıda sizi həm də 40 dərəcə isti gözləyir...
- İsti barədə məlumatım var. Baş məşqçimiz deyib ki, hava paytaxtınızda çox istidir. Sadəcə, bu, bizə problem deyil. Bu yay Bilbaoda da çox isti oldu. Bəzi günlərdə 35-36 dərəcə istilik yaşadıq. Ona görə öyrəşmişik. İstənilən halda cavab görüşündə də məqsədimiz qələbə qazanmaq olacaq.
- Səviyyə baxımından "İnter" "Atletik"dən çox geri qalır?
- Bir oyuna görə komandaya qiymət vermək çətindir. Avroliqada iki mərhələ keçmisinizsə, deməli, zəif komanda deyilsiniz. Sadəcə, təcrübə baxımından biz favorit komanda sayılırıq. İlk hissədə "İnter" yaxşı oynadı. Çoxlu sayda qol vəziyyətinin qarşısını aldı. Ona görə cavab görüşündə ehtiyatlı olmalıyıq.
- "İnter" cavab görüşündə "Atletik"ə iki qol vura bilər? Siz buna inanırsınız?
- Futbolda hər şey mümkündür. "İnter" iki qol vura bilər. Əgər biz buna imkan versək. Biz isə buna imkan verməyəcəyik. Bakıda da qələbə qazanmaq istəyirik. Sonra isə rahat pley-offa hazırlaşacağıq.
- Rəqibin heyətində hansı futbolçunu fərqləndirə bilərsiniz?
- Yeddi nömrəli futbolçunuz (Nika Kvekveskirini nəzərdə tutur - red.) yadımda qaldı. Bir də qapıçınız (Səlahət Ağayev). Qolkiperin işi bu gün çox oldu. Bizim qapıçımız isə ondan fərqli özünü yaxşı tərəfdən göstərmək üçün imkan qazanmadı. Fikirləşirəm ki, "İnter" evdə daha yaxşı mübarizə aparacaq. Ona görə arxayınlaşmaq olmaz.