Qarabağ üçün tarixi şans
Bu gün UEFA Çempionlar Liqasında üçüncü təsnifat mərhələsinin cavab oyunları keçiriləcək. Azerisport.az xəbər verir ki, Azərbaycanı qitənin ən nüfuzlu klub turnirində bu mövsüm yenə son ölkə çempionu "Qarabağ" təmsil edir.
Ağdam klubu mübarizəyə birbaşa ikinci təsnifat mərhələsindən başlayıb. Bölgə təmsilçisinin startdakı rəqibi Çernoqoriya "Rudar"ı idi. "Qarabağ" bu rəqibinə evdə qalib gələ bilməsə də (0:0), səfərdə minimal hesablı üstünlüklə (1:0) mərhələ adlayan tərəf olmuşdu. Bu dəfə isə Ağdam klubu daha adlı-sanlı rəqiblə - Şotlandiya "Seltik"i ilə mübarizə aparır. Hansı ki, bu komanda İslandiya "Styarnan"ını həm evdə (2:0), həm də səfərdə (4:1) məğlub edərək, mərhələ adlayıb. Təəssüf ki, elə "Qarabağ" da səfərdə keçirdiyi ilk oyunda bu komandaya 0:1 hesabıyla uduzub.
Böyük tarixə malik "Seltik" 1887-ci ildə yaradılıb. 127 yaşlı qocaman klub Şotlandiyanın Qlazqo şəhərini təmsil edir. Klubun indiki prezidenti İan Bankir, baş məşqçisi isə Ronni Deyladır. Komanda ev oyunlarını doğma şəhərdə - 60 411 azarkeş tutumuna malik "Seltik Park" stadionunda keçirir.
"Reyncers"lə bərabər Şotlandiyanın iki ən nəhəng klubundan biri olan "Seltik" həm daxili, həm də xarici arenada xeyli uğurlara imza atıb. Bu komanda 46 dəfə (!) ölkə çempionu olub. 36 dəfə Şotlandiya kubokunu əldə edən komanda 15 dəfə də ölkənin Liqa Kubokuna sahib çıxıb. Bu komanda 1967-ci ildə indi UEFA Çempionlar Liqası adlanan turnirin qalibi olub. 1969/70 mövsümündə isə ÇL-in finalında məğlub olaraq, gümüş medallarla kifayətlənib. "Seltik" 2002/03 mövsümündə Avropa Liqasının da finalına çıxıb, lakin həlledici görüşdə məğlub olub. Bir sözlə, Şotlandiya nəhənginin uğurları saymaqla qurtaran deyil.
Bu klub ÇL-in yeni mövsümünə də məhz son ölkə çempionu kimi vəsiqə qazanıb. Mövsüm ərzində keçirdiyi 38 oyunda hamıdan çox - 29 qələbə qazanan komanda 5 dəfə heç-heçəyə razılaşıb, cəmi 4 dəfə meydanı məğlub tərk edib. Rəqib qapılarından 84 (!) top keçirən qlazqolular özləri cəmi 17 dəfə məyus olublar ki, bu göstəricilər digər klublarınkından kifayət qədər çox fərlqlənir. Məsələn, digər 11 klubdan heç biri 60 qol həddinə çatmayıb. Buraxılan qolların sayına görə isə ən yaxın göstəriciyə malik olan qapısında 33 top görmüş "Aberdin"dir.
"Qarabağ"ın rəqibinin heyətində Honduras, Nigeriya, Hollandiya, İsrail, Türkiyə, İrlandiya, Serbiya, Avstraliya, Belçika, İsveçrə, İsveç, Norveç, İtaliya, İngiltərə kimi ölkələrdən xeyli legioner çıxış edir. Komanda artıq Şotlandiya çempionatının yeni mövsümünə də uğurlu start verib. Belə ki, bir neçə gün öncə "Seltik" öz meydanında "Ross Kaunti"yə 2:0 hesabıyla qalib gəlib.
Göründüyü kimi, "Qarabağ"ın bu dəfəki rəqibi heç də asan keçiləsi komanda deyil. Bu üzdən də komandamızın "Seltik" səddini keçməsi üçün çox böyük güc sərf etməsi lazım gələcək. Səfərdə keçirilən ilk oyunda 0:1 hesabıyla uduzması ağdamlıların işini daha da çətinə salıb. Amma cavab görüşünün evdə keçirilməsi təmsilçimiz üçün kiçik bir üstünlük sayıla bilər. Qurban Qurbanovun komandası azarkeşlərin də dəstəyi sayəsində Bakıdakı qarşılaşmada uğura ümid edə bilər. Mərhələ keçmək üçün isə iki cavabsız qolla qalib gəlmək lazımdır. Bu mənada şotlandlardan evdə qol buraxmamaq da böyük əhəmiyyət daşıyır. Çünki qol buracağı halda "Qarabağ" mərhələ keçmək üçün 3 top fərqi ilə qalib gəlmək məcburiyyətində qalacaq ki, ÇL-in pley-off mərhələsinə vəsiqə əldə etsin.
Yeri gəlmişkən, cari mövsümdə ən böyük ümidlər "Qarabağ"adır. Məsələ burasındadır ki, Ağdam klubu ötən il olduğu kimi, bu mövsümdə də qitə miqyaslı turnirlərdə qrup mərhələsinin iştirakçısı olmaq iddiasındadır. Komandanın belə bir uğura Çempionlar Liqasında da nail olub, tarix yazmaq şansı var. Amma bu, çox çətin olsa da, ən azı Avroliqanın qrup mərhələsinə düşmək mümkündür. Bu mənada komandamızın ÇL-in üçüncü təsnifat mərhələsində də uğur qazanması vacibdir. "Seltik" səddini keçəcəyi halda Ağdam klubu artıq Avroliqanın qrup mərhələsini özü üçün təmin etmiş olacaq və eyni zamanda ÇL-in pley-off matçlarında iştirak edəcək. Həmin oyunlarda da qələbə qazanacağı halda təmsilçimiz ilk dəfə ÇL-in qrup mərhələsində çıxış etmək şansı qazanacaq. Uduzacağı halda isə komandamız Avroliqanın qrupunda çıxış edəcək. "Seltik" səddini keçə bilməyəcəyi halda isə, ağdamlılar yenə mübarizəni dayandırmayacaq. Belə olan halda komandamız Avroliqanın pley-off mərhələsində çıxış hüququ əldə edəcək.
Sonda onu da bildirək ki, avrokuboklarda qazanılan hər uğur Azərbaycanın UEFA-dakı klub reytinqinə təsirsiz ötüşmür. Belə ki, klublarımızın istənilən qələbəsi ölkəmizə 0,250, heç-heçə isə 0,125 reytinq xalı qazandırır. Hazırda Azərbaycan UEFA reytinqində 54 ölkə arasında 29-cu pillədədir və hesabında 12.375 reytinq xalı var. Onun da 1.875 xalı cari mövsümdə qazanılıb ("İnter" - 0.625, "Qəbələ" - 0.625, "Qarabağ" - 0.375, "Neftçi" - 0.250).
"Qarabağ" 11.475 xalla klub sıralamasında Avropanın 132-ci komandasıdır. "Seltik" isə 38.710 reytinq xalı ilə 45-cidir.
Çempionlar Liqası
Üçüncü təsnifat mərhələsi (cavab oyunu)
5 avqust
21:30. “Qarabağ” - “Seltik”
Baş hakim: Martin Stromberqsson (İsveç).
Baş hakimin köməkçiləri: Daniel Qustavvson, Stefan Hallberq (İsveç).
Dördüncü hakim: Yohan Hamlin (İsveç).
UEFA nümayəndəsi: Peter Lundstrom (Finlandiya).
Hakim-inspektor: Alan Hamer (Lüksemburq).
Bakı. Tofiq Bəhramov adına Respublika stadionu.
İlk oyun: 0:1
