Rəşad Sadiqov: Qrupdan çıxmaqla daha bir tarix yazmağa çalışacağıq
"Qəbələ"nin yarımmüdafiəçisi Rəşad Sadiqov Avropa Liqasının pley-off mərhələsi çərçivəsində Yunanıstanın "Panatinaikos" klubuna qarşı keçirdikləri cavab matçından (2:2, ilk oyun 0:0) sonra azerisport.az saytının suallarını cavablandırıb:
- Oyunla bağlı nə deyə bilərsiniz?
- Çox gərgin oyun alındı. Rəqibin adı çox şeydən xəbər verir. Amma biz tarixi bir uğura imza atmaq üçün yaxşı şans əldə etmişdik. Bu şansdan da yararlanmağı bacardıq.
- Hesabda iki dəfə önə keçsəniz də, üstünlüyü qoruya bilmədiniz. Matçı məğlub başa vuracağınıza dair qorxu var idi?
- Matçın sonlarında rəqib hesabı bərabərləşdirəndən sonra həyəcan var idi. Rəqib daha güclü təzyiq etməyə başlamışdı. Amma biz lazım olan nəticəni qorumağı bacardıq. Qələbə də qazana bilərdik. Son 15 dəqiqədə çox yaxşı əks-hücumlar təşkil etdik. Sadəcə, onlardan yararlana bilmədik. Bütövlükdə, 2:2 hesabı yaxşı nəticədir. Çünki bu nəticə bizə tarix yazmağa, komandanı ilk dəfə Avroliqanın qrup mərhələsinə çıxarmağa imkan yaratdı.
- Bu, sizin Avroliqanın qrup mərhələsinə ikinci vəsiqənizdir. İlk dəfə buna "Neftçi" ilə nail olmuşdunuz...
- Şadam ki, iki dəfə müxtəlif klublarla Avroliqanın qrup mərhələsində çıxış edəcəyəm.
- Hansı sizin üçün daha qiymətlidir?
- Hər ikisinin mənim üçün öz dəyəri var. Hər ikisi vacibdir. Ona görə də hər komanda ilə qazandığımı bu uğurlar yadımda qalacaq.
- "Qəbələ" ilə yanaşı "Qarabağ" da qrup mərhələsinə vəsiqə qazandı...
- Mən oyundan sonra Rəşad Sadıqova mesaj yazdım və həm öz, həm də klubumuzun adından təbrik etdim. Onlar da artıq bizi təbrik ediblər. Şadam ki, iki Azərbaycan klubu eyni vaxtda Avroliqanın qrupunda mübarizə aparacaq. Bu, ölkə futbolu üçün böyük uğurdur.
- Püşkatmadan nə gözləyirsiniz?
- Asan rəqib gözləməyə dəyməz. Kimin düşməsindən asılı olmayaraq, hər oyunda layiqli çıxış etməyə çalışacağıq.
- Hansı nəticəyə imza atmaq sizin üçün uğur sayılacaq?
- Qrupdan çıxmaq. Belə bir uğura hələ heç bir klubumuz nail olmayıb. Niyə də bu mövsüm biz buna nail olmayaq?