Raydell Pupon: Qarabağ qrup mərhələsində də uğurlu çıxış etməyə çalışacaq
"Qarabağ"ın hücumçusu Raydell Puponun azerisport.az saytına müsahibəsi
- İlk növbədə Avropa Liqasının qrup mərhələsinə vəsiqə qazanmağınızla bağlı ilkin təəssüratlarınızı bilmək istəyərdik...
- Buna çox şadam. Avropa Liqasının əsas mərhələsində mübarizə aparmaq şansı qazanmağımız çox gözəldir. Şəxsən mənim üçün bu, debütdür. Çünki heç vaxt avrokubokların əsas mərhələsində oynamamışdım. Bu üzdən də özümü ən yaxşı tərəfdən göstərməyə çalışacağam.
- Artıq qrup mərhələsindəki rəqibləriniz bəllidir. Şanslarınızı necə qiymətləndirə bilərsiniz?
- Sadəcə onu deyə bilərəm ki, komandamız ən yaxşı şəkildə çıxış etməyə borcludur. Əlbəttə, rəqiblərimiz güclüdür və bizə heç də asan olmayacaq. Amma əminəm ki, onların hər birini yaxşı analiz edərək, layiqli mübarizə apara biləcəyik. Hər şeyin öz vaxtı var.
- "Qarabağ" İsveçrə "Yanq Boyz"u ilə ev matçında cari mövsümdəki ən yaxşı oyunlarından birini sərfilədi. Siz bu matçla bağlı nə deyə bilərsiniz?
- Oyuna çox yaxşı başladıq. Rəqibin ilk dəqiqələrdə azlıqda qalması, erkən qol da işimizi asanlaşdırdı. Ardından daha iki qol vurduq. Bundan sonra "Yanq Boyz"un matçda dönüş yaratması mümkünsüz idi. Buna nə gücləri, nə də vaxtları çata bilərdi.
- Siz meydana ikinci hissədə çıxsanız da, dərhal qol vəziyyəti yaratdınız...
- Mən "Qarabağ"dakı ilk oyunumdan etibarən belə qol vəziyyətlərini gözləyirdim. Lakin bu oyundakı qol vəziyyətini əldən verməyimə çox üzüldüm.
- Bəs siz niyə həmin epizodda qapının künclərini yox, mərkəzini nişan aldınız?
- (gülür) Elə mən də zərbəni vurandan sonra özümə sual verdim ki, "niyə məhz belə vurdum"? Dşündüm ki, gecə yata bilməyəcəyəm.
- Qarşıda millinin seçmə mərhələ oyunları ilə bağlı iki həftəlik fasilə var...
- Bu fasilə doğrudan da kollektivə müsbət təsir göstərə bilər. Hər birimizin daha yaxşı anlaşması üçün imkan əldə edəcəyik. Bu, xüsusilə də mənim üçün çox vacibdir. Bu, komandaya tam alışmağıma kömək edə bilər.