Əsgər Abdullayev: İtaliya ilə oyunda şərtlərin eyni olacağını düşünmürəm
Azərbaycan yığmasının sabiq baş məşqçisi Əsgər Abdullayevin azerisport.az saytına müsahibəsi
- Siz 2002-ci ildə Azərbaycan yığmasının məşqçilər korpusunda İtaliyaya qarşı oyunda (0:2) iştirak etmisiniz. Həmin görüşü necə xatırlayırsınız?
- Həmin dövrdə mən Vaqif Sadıqovun məşqçilər korpusunda idim. Yaxşı oyun göstərdik. Xeyli qol vəziyyəti yaratdıq. Ümid edirəm ki, milli komandamız ən azı yenə də elə oyun sərgiləyəcək, amma yaxşı nəticə qazanmaq şərtilə.
- İtaliya yığması həmin dövrlə müqayisədə çox dəyişib?
- Məncə, onlar 13 il öncə daha güclü idilər. Həm sərgilədikləri oyuna, həm də heyət baxımından. Həmin heyət ulduz futbolçulardan təşkil olunmuşdu. Təsadüfi deyil ki, onlar dörd il sonra dünya çempionu adını qazandılar.
- Bəs qarşıdakı oyundan nə gözləyirsiniz?
- Braziliya, Almaniya və İtaliya hamıdan çox dünya çempionu olub. Bakıya dünyanın ən populyar komandalarından biri gəlir. Böyük ənənələri olan komandadır. Bizim yığmamız isə hazırda yüksəlişdədir. İndi millimizdə psixoloji vəziyyət də düzəlib. Amma rəqibi də düzgün qiymətləndirmək lazımdır.
- Öz meydanımızda italyanlarla heç-heçə etsək, bu, uğurlu nəticə sayıla bilər?
- Proqnoz verməyi sevmirəm. Şübhəsiz ki, heç-heçə yaxşı nəticə olacaq. 13 il öncə uşaqlar meydanda bütün güclərini qoymuşdular. Amma ümid edirəm ki, bu dəfə də elə olacaq və sonda meydanı əliboş tərk etməyəcəklər.
- Azərbaycan - İtaliya matçının Bakı Olimpiya stadionunda keçirilməsi millimizin oyununa nə dərəcədə təsir edə bilər? Komandamızın bu arenada ilk dəfə oynayacağını nəzərə alsaq, şərtlər eyni olacaq...
- Şərtlərin eyni olacağını deməzdim. Çünki bizim tərəfimizdə rəqibdən fərqli güclü azarkeş dəstəyi olacaq. Bu, az əhəmiyyət daşımır. İnanıram ki, azarkeşlərimiz komandamızı yaxşı dəstəkləyəcəklər.