Riçard Almeyda: Qurban Qurbanovun Monako ilə oyunda düzgün seçim edəcəyinə inanıram
"Qarabağ"ın yarımmüdafiəçisi Riçard Almeyda Topaz Premyer Liqasının 11-ci turu çərçivəsində AZAL-a qarşı keçirdikləri oyundan (2:0) sonra azerisport.az saytının suallarını cavablandırıb.
- Komandanız AZAL-ı heç də asanlıqla yenmədi...
- Belə çətin olacağını bilirdik. Amma oyun elə istədiyimiz kimi alındı. Şükürlər olsun ki, rəqib qapısına yol tapa bildik. Vacib xallar qazandıq.
- Siz oyunun gedişində deyəsən, zədələndiniz. Çox ciddidir?
- Xeyr, zədələnməmişəm. Sadəcə, ayağımdan zərbə aldım və ağrı hiss etdim. Hazırda hər şey normaldır.
- "Qarabağ"ın son turlarda qarışıq heyətlə oynaması Avropa Liqasında sizə çətinlik yaratmayacaq?
- Heyətimizdə kifayət qədər futbolçu var. Fikrimcə, Qurban Qurbanov düzgün seçim edəcək və Avroliqada da güclü heyətlə oynayacağıq.
- Reynaldo ilə meydanda çox yaxşı anlaşdığınızı hamı bilir. Bəs Armenterosla necə anlaşırsınız?
- Reynaldo ilə üç ildir birgə çıxış edirik. Ona görə də bir-birimizi yaxşı başa düşməyimiz normaldır. Samuel isə komandamıza yeni gəlib. O, bizə, biz də ona alışmağa çalışırıq. Hər oyunda anlaşma səviyyəsi daha da yaxşılaşır.
- Komandanın indiki çıxışından razısınız?
- Həmişə özümüzü yaxşı tərəfdən göstərməyə, baxımlı oyun sərgiləməyə çalışırıq. Hər gün məşqlərdə bunun üçün çalışırıq. Baş məşqçi də bunları görür. Ona görə də bizim tərəfimizdən oyunumza qiymət vermək düzgün deyil.
- Amma bu mövsüm əvvəlki illərdəki qədər baxımlı futbol sərgiləyə bilmirsiniz...
- O vaxt Leroy Corcla Muarem Muarem də bizimlə idi. Bir-birimizi çox yaxşı başa düşürdük. İndi isə heyətdə yeni futbolçular var. Ona görə də müəyyən vaxta ehtiyac var.
- Deməli, Leroyla Muaremin yeri görünür?
- Onların hər ikisi "Qarabağ" üçün vacib oyunçu idi. İndi isə baş məşqçimiz yeni futbolçulara güvənir. Zamanla hər şeyin düzələcəyinə ümidliyəm.
- Qarşıda "Monako" ilə vacib oyun var. Qrupdan çıxmaq şanslarınız barədə nə deyə bilərsiniz?
- AZAL-la oyun yenicə bitib. "Monako" ilə görüş barədə bundan sonra düşünəcəyik.
- Bu komandanı doğma meydanda məğlub edə biləcəksiniz?
- Həyatda mümkünsüz heç nə yoxdur.