Dieqo Martins: Pulumuzu alırıq, hansısa problemimiz yoxdur
"İnter"in braziliyalı hücumçusu Dieqo Martins Topaz Premyer Liqasının 11-ci turu çərçivəsində "Zirə"yə qarşı keçirdikləri oyundan (0:0) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Yaxşı oynadığımızı düşünmürəm. Rəqibi öz meydanımızda qəbul etdiyimizi nəzərə alsaq, daha yaxşı çıxış edə bilərdik.
- Bəs belə oynamağınıza nə səbəb oldu?
- Yorğunluq. Həftəiçi də oyun keçirmişdik. Belə görünür ki, komanda "Zirə" ilə matça qədər tam bərpa ola bilməmişdi. Həm də bütün oyunlarda yaxşı futbol sərgiləmək də mümkünsüzdür.
- Deməli, "İnter"in iki xal itirdiyini iddia edirsiniz?
- Öz meydanımızda qələbə qazanmağa borclu idik. Bu rəqibin bizimlə turnir cədvəlində qonşu pillədə qərarlaşması da qələbə qazanmağımızı şərtləndirən amillərdən biri idi. Amma "Zirə"nin cari mövsümdə necə çıxış etdiyini nəzərə alsaq, bu komanda ilə heç-heçə heç də pis nəticə saılmamalıdır. Amma istənilən halda iki xal itirdiyimizi düşünürəm.
- Hər halda "İnter" üçüncü pillədəki yerini qorudu...
- Elədir. Lakin qələbə qazanmaqla liderlər qrupundakı mövqeyimizi daha da yaxşılaşdıra bilərdik. Üçüncü pillədəki yerimizi qorumaq üçün daha çox xal toplamalıyıq.
- "İnter" son iki turda dörd xal itirib. Bu, komandanızın zəif çıxışından xəbər verir, ya rəqiblərinizin gücündən?
- Bizdə heyətlə bağlı itkilər var. Üstəlik, yorğunluq da sözünü deyir. Mən özüm də bir qədər yorğunluq hiss edirəm.
- Klubunuzda maliyyə vəziyyəti necədir?
- Mənim fikrimcə, hər şey normaldır. Hələ ki, pulumuzu alırıq. Problem görmürəm.