Elvin Yunuszadə: Monakoda bəxtimiz gətirmədi, Bakıda isə azarkeşləri sevindirməyə çalışacağıq
"Qarabağ"ın müdafiəçisi Elvin Yunuszadə Topaz Premyer Liqasının 11-ci turu çərçivəsində AZAL-a qarşı keçirdikləri oyundan (2:0) sonra azerisport.az saytının suallarını cavablandırıb.
- Oyunla bağlı nədeyə bilərsiniz?
- Ölkə çempionatı elə bir səviyyəyə çatıb ki, heç bir oyunda asanlıqla qələbə qazanmaq olmur. AZAL-la oyun bizim üçün çox çətin oldu. Amma əsas odurki, qələbə qazandıq. Üç xal qazanmaq komandamız üçün çox vacibidi. Artıq sakitcə Avropa Liqasında keçirəcəyimiz "Monako" ilə oyuna hazırlaşa bilərik.
- Yeri gəlmişkən, Fransanı təmsil edən bu komanda ilə görüşdən nə gözləyirsiniz?
- Biz bu komandaya qarşı səfərdə pis oynamadıq. Sadəcə, Monakoda bəxtimiz gətirmədi. Rəqibimizin gücü hər kəsə bəllidir. Amma Bakıdakı oyunda azarkeşlərimizi sevindirmək istəyirik. Xal və ya xallar qazanmağa çalışacağıq.
- "Qarabağ" son oyunlarda elə də çox qol vura bilmir. Bunun səbəbini nədə görürsünüz?
- Komanda bütün oyunlarda yüksək səviyyəli futbol sərgiləyə bilməz. Enişlər olur, yüksəliş olur. Bunu normal qəbul etmək lazımdır. Biz çox oyun keçiririk. Demək olar ki, üç-dörd gündən bir oyuna çıxırıq. Bu, həm fiziki, həm də psixoloji baxımdan yorğunluğa səbəb olur.
- Sözlərinizdən belə çıxır ki, "Qarabağ" indi eniş dövrünü keçirir?
- Xeyr, eniş yoxdur. Sadəcə, yorğunluq var.
- Amma heyətinizdə kifayət qədər futbolçu var ki, yorğunluq olmaması üçün balans yaradılsın...
- Burada bir məqam var. Komanda optimal heyətlə daha yaxşı oyun sərgiləyir. Amma hər oyuna müxtəlif heyətlərlə çıxmaq anlaşma səviyyəsinin aşağı düşməsinə səbəb olur. Ona görə də istədiyimiz kimi çıxış etməməyimiz normaldır. Lakin biz hər oyuna eyni qaydada hazırlaşırıq. Bizim üçün "Monako"ya və ya AZAL-a qarşı oynamağın fərqi yoxdur. Üstəlik, rəqiblərimiz də bizə qarşı xüsusi motivasiya ilə oynayırlar. Bunun özü də kiçik amil deyil.
- Sizi son dövrlər əsas heyətdə daha çox görmək olur...
- Əlimdən gələni etməyə çalışıram. Qurban Qurbanov sağ olsun, o, mənə çox kömək edir. Burada uyğunlaşma baxımından problem hiss etmədim. Sanki bir ildir "Qarabağ"da çıxış edirəm. Amma komandamızda indi elə bir vəziyyət yaranıb ki, istənilən futbolçu meydana çıxa bilər.
- "Qarabağ"a "Neftçi"dən gəlmişdiniz. Bu iki klub arasında hansı fərqlər var?
- Hər bir komandanın öz yeri var. "Neftçi" daha çox meydanda mübarizəyə üstünlük verirdisə, "Qarabağ" topla oynamağı sevir. Bu baxımdan mənim üçün "Qarabağ"da oynamaq daha rahatdır.
- Amma keçmiş klubunuz hazırda heç də yaxşı günlərini yaşamır...
- "Neftçi"yə uğurlar arzulayıram. Bütün komandalarda eniş və yüksəliş dövrü olur. İnanıram ki, "Neftçi" yenidən əvvəlki qüdrətini geri qaytaracaq.