Anyete: Penaltini Ruslan Qurbanovun yerinə yetirməsində problem görmürəm
"Neftçi"nin hücumçusu Topaz Premyer Liqasının 11-ci turu çərçivəsində "Sumqayıt"a qarşı keçirdikləri oyundan (2:1) sonra azerisport.az saytının suallarını cavablandırıb.
- Altı oyundan sonra ilk dəfə qələbə qazana bildiniz. Oyunla bağlı nə deyə bilərsiniz?
- Çətin oyun alındı. "Sumqayıt" çox möhkəm komandadır. Onlar qələbə qazanmaq üçün böyük istəklə oynadıqlarını göstərdilər. Amma şadıq ki, qələbə bizə qismət oldu. Vacib qələbədir. Sumqayıtdan məğlub qayıtmaq istəmirdik. Çünki son turlar kifayət qədər uğursuz alınmışdı.
- "Neftçi" yenə iki fərqli hissə keçirdi...
- Mən belə deməzdim. Hansı hissədəki çıxışımız xoşunuza gəlmədi?
- İkinci hissədəki oyununuz daha yaxşı idi...
- Amma mən ikinci hisədə elə də yaxşı təsir bağışladığımızı deməzdim. Birinci hissədə isə topa daha yaxşı nəzarət edirdik, qol vəziyyətləri yaradırdıq. Sadəcə, ikinci hisədə iki məhsuldar hücum təşkil etdik və qalib gəldik.
- Sizin fərqlənmək üçün şansınız olsa da, penalti nöqtəsinə yaxınlaşmadınız. Bu, nə ilə bağlıydı?
- Penaltiləri mən yerinə yetirirəm. Amma özümü buna tam hazır hiss etməyəndə bunu Ruslan Qurbanov həyata keçirir.
- Bəs siz daha gənc komanda yoldaşınızın belə məsuliyyətli vəzifənin öhdəsindən gələ bilməyəcəyindən qorxmadınız?
- Mən zədədən yenicə qayıtmışam. Qol vuracağıma əmin deyildim. Penaltini Ruslanın yerinə yetirməsində heç bir problem görmürəm. Şadam ki, o da zərbəni dəqiq yerinə yetirdi. Həm də o, artıq ikinci dəfədir penaltini dəqiq yerinə yetirir.
- Siz hələ "Neftçi"də qol vurmaq keyfiyyətlərinizi nümayiş etdirə bilməmisiniz. Nə vaxt qol vurmağa başlayacaqsınız?
- Mənə bir qədər vaxt lazımdır. Ötən mövsüm Bolqarıstan çempionatında "Levski"nin heyətində də bir neçə tur qol vura bilmədim, amma mövsümü komandanın ən yaxşı bombardiri kimi bitirdim. Öz gücümə əminəm və düşünürəm ki, "Neftçi"də də qarşıdakı turlarda qollar vuracağam.
- Bundan sonra sizdən nə gözləyək?
- Qələbə qazanmağa davam etməliyik. Qələbəsiz oyunlar seriyamız kifayət qədər uzandı. Elə bir o qədər də qələbə qazanmağımızı istərdim. Qarşıda bizi "Rəvan"la oyun gözləyir. Hazırlaşıb, bu oyunda da qalib gəlməyə çalışacağıq.