Tadas Simaitis: Qarabağa məğlub olacağımızı düşünmürəm, qalib də gələ bilərik
"Kəpəz"in qapıçısı Tadas Simaitis Topaz Premyer Liqasının 12-ci turu çərçivəsində AZAL-a qarşı keçirdikləri oyundan (1:1) sonra azerisport.az saytının suallarını cavablandırıb.
- Qələbə hesabını qorumağınıza nə mane oldu?
- AZAL birinci hissədə yaxşı oynadı. İkinci hissədə isə biz yaxşı çıxış etdik. Bu, futboldur. Beş dəqiqənin içində hər şey dəyişə bilər. AZAL matçın sonlarında pressinq tətbiq etməyə başladı və qapımıza yol tapdı.
- Siz zərbəni dəf edə bilməzdiniz?
- (gülür) AZAL-ın futbolçusu 16 metrdən çox güclü və dəqiq zərbə endirdi. Həmin epizodda komandama kömək edə bilmədim. Amma qarşıdakı oyunlarda buna çalışacağam.
- Yəqin ki, oyundan öncə bu görüşdə 3 xal qazanacağınızı düşünürdünüz?
- Biz hər oyuna qələbə ümidi ilə çıxırıq. Sadəcə, bunun üçün meydanda mübarizə aparmaq lazımdır. Yaxşı oynayacaqsansa, qələbə qazanacaqsan. Əks halda uğur qazana bilməzsən.
- "Kəpəz" bu oyunda iki xal itirdi, ya bir xal qazandı?
- İki xal itirdiyimizi demək olar. Amma AZAL da yaxşı komandadır. Onların oyunu xoşuma gəldi. Aqressiv oynayırlar.
- Komandanız bu mövsüm avrokuboklara vəsiqə qazana bilər?
- "Kəpəz"in mövsümü neçənci pillədə başa vuracağını bilmirəm. Amma biz hər oyuna qələbə üçün çıxırıq və bunun üçün sonadək mübarizə aparırıq. Hər halda bizim üçüncü yeri tutmaq, avrokuboklara düşmək şansımız var. Hər şeyin necə başa çatacağını isə mövsümün sonunda görəcəyik.
- Qarşıdakı turda sizi "Qarabağ"la oyun gözləyir. Çempiondan xal ala, birinci dövrədəki məğlubiyyətin əvəzini çıxa biləcəksiniz?
- Həmin görüşdə bərabər oyun getmişdi. Qapımıza iki penalti təyin olundu. Düşünmürəm ki, "Qarabağ"a yenə uduzacağıq. Mübarizə aparacağıq. Biz də qalib gələ bilərik, rəqib də. Bu, futboldur. "Qarabağ" da yaxşı komandadır.
- "Qarabağ"ın Reynaldosuz oynaması sizin üçün üstünlük sayıla bilər?
- Bunda problem yoxdur. Oynasa yaxşıdır. Oynamasa ondan da yaxşıdır (gülür). Amma belə "Qarabağ"da çoxlu yaxşı futbolçu var.
- Sizi niyə Litva yığmasına dəvət etmirlər?
- Yığmamızda yaxşı qapıçılar var. Arlauskis "Uotford"da, Karçemarskas "Qaziantepspor"da oynayır. Çernyauskas da yaxşı qapıçıdır. Litva yığmasında baş məşqçi dəyişikliyi baş verəcək. "Kəpəz"də yaxşı çıxış etsəm, yəqin ki, mənə də dəvət göndərərlər.