Ruslan Abışov: İnanmıram ki, Roman Qriqorçuk bu vəziyyətdə Qəbələdən getsin
"Qəbələ"nin müdafiəçisi Ruslan Abışov Topaz Premyer Liqasının 12-ci turu çərçivəsində "İnter"ə qarşı keçirdikləri oyundan (1:1) sonra azerisport.az saytının suallarını cavablandırıb.
- Oyun barədə nə deyə bilərsiniz?
- Son turlarda biz xeyli xal itirmişdik. Ona görə də bu gün qələbə qazanıb, vəziyyətimizi yaxşılaşdırmaq istəyirdik. Yenə bütün oyun ərzində hücum etdik, amma qol vəziyyətlərindən yaxşı yararlana bilmədik. Aydın məsələdir ki, tez bir zamanda vəziyyəti yaxşılaşdırmalıyıq. Əks halda hər şey daha da pis alına bilər. Ümid edirəm ki, yığmaların oyunlarına görə yaranan fasilə dönəmində komandamızın da işləri düzələcək.
- "Qəbələ"nin qələbə qazanmasına nə mane oldu?
- Siz də görürsünüz ki, biz çalışırıq. Sadəcə, top qapıya getmək istəmir. Komandamız sanki, tilsimlənib. Bu psixoloji səddi aşmağımız lazımdır.
- Nəticələriniz Roman Qriqorçukun komandadan gedəcəyi barədə yayılan xəbərlərdən sonra pisləşməyə başlayıb...
- Mən bu barədə danışmışam və bir daha deyirəm ki, onun komandadan getməsi barədə heç birimiz düşünmürük. Baş məşqçi də bizimlədir. İnanmıram ki, Qriqorçuk belə bir vəziyyətdə komandadan getsin.
- Sergey Zenyovun zədəsi oyununuza nə dərəcədə təsir etdi?
- Bəli. Çünki oyuna qədər biz məhz onun oynayacağını nəzərə alaraq taktika qurmuşduq. Amma matçın startı ərəfəsində Zenyovun heyətdən çıxarılması oyunumuza təsir etdi. Sadəcə, Samir Zərgərov onu layiqincə əvəz etdi.
- Ola bilər ki, bunlar hamısı yorğunluqdandır?
- Deməzdim ki, bunların hamısı yorğunluqdandır. Futbolçuların üzərində psixoloji təzyiq var. Bir qələbə hər şeyi qaydasına gətirəcək.
- Komandanız son iki oyunda öz meydanında qol buraxır...
- "Kəpəz"dən əks-hücum nəticəsində qol buraxdıq. "İnter"lə oyunda da demək olar ki, eyni şey oldu. Bu səhvlərdən nəticə çıxarmaq lazımdır.
- Noyabrın 17-də Moldova ilə yoxlama oyunu var. Sizcə, bu oyunun doldurulması mümkünsüz görünən Bakı Olimpiya stadionunda keçirilməsi nə dərəcədə düzgündür?
- Vacib oyundur. Oyunun keçirilmə yerinə gəlincə, bu qərarı AFFA qəbul edib və müzakirə etməyə dəyməz. Harada lazımdır, orada da oynamalıyıq.