Səlahət Ağayev: Qəbələ ilə oyuna ona görə çıxdıq ki, sentyabr ayının pulu ödənildi
"İnter"in qapıçısı Səlahət Ağayev Topaz Premyer Liqasının 12-ci turunda "Qəbələ"yə qarşı keçirdikləri səfər oyunundan (1:1) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir.
- Oyunla bağlı nə deyə bilərsiniz?
- Qəbələdə bizi çətin oyun gözlədiyini bilirdik. Bu komanda ilə oyunlarımız həmişə çətin keçib. Bu oyunda da komandamız sonadək mübarizə apardı. İlk qol buraxan biz olsaq da, heç-heçəyə nail olduq.
- Bu, "İnter"in ardıcıl üçüncü heç-heçəsidir. Üç oyuna altı xal itkisi çox deyil?
- "İnter"in hansı vəziyyətdə olması hər kəsə yaxşı bəllidir. Belə vəziyyətdə bu cür oynamaq, xal qazanmaq qəhrəmanlıqdır.
- Matç zamanı meydan sahiblərinin azarkeşləri ilə probleminiz oldu. Nə baş vermişdi?
- Qapı arxasında əyləşmiş azarkeşlər təhqiredici ifadələr işlədirdilər. Onlara söyüş söyməmələrinə dair xəbərdarlıq etdim. Mən əcnəbi futbolçu deyiləm, azərbaycanlıyam. Onların da nə dediyini yaxşı başa düşürdüm.
- Klubun maliyyə durumunda irəliləyiş var?
- Xüsusi dəyişiklik yoxdur. Həmişəki kimi, çətin vəziyyətdəyik.
- Klub prezidentinin sözlərinə görə, futbolçular artıq sentyabr ayının pulunu alıblar. Bu, düzdür?
- Bəli, biz sentyabr ayının pulunu almışıq. Amma maaşı 50 yox, 30 gündən bir vermək lazımdır.
- Nə qədər dözmək fikrindəsiniz?
- Bizim klubla müqaviləmiz var. Ona görə də dözməliyik.
- Komanda yoldaşlarınız vəziyyət düzəlməyəcəyi təqdirdə "Qəbələ" ilə oyuna çıxmayacaqlarını demişdilər...
- Bəli, belə bir şey olub. Amma biz sentyabr ayının pulu ödənildiyinə görə oyuna çıxdıq. Bir daha deyirəm ki, maaşı 50 gündən bir vermək olmaz. Əvvəllər normal idi. Amma son vaxtlar çox gecikdirilir.
- Avrokubok oyunlarına görə mükafat nə oldu?
- Hələ heç bir xəbər yoxdur.
- Bəs rəhbərlik nə deyir?
- Hələ heç kim heç nə deməyib. Klubun prezidenti Georgi Nikolovdur, amma biz onun işini hiss etmirik. Klubda müraciət edəsi kimsə yoxdur.
- Vəziyyət dəyişməsə, qışda komandadan ayrılmağınız mümkündür?
- Mən komandanı hələ yayda tərk edə bilərdim. Təklif var idi. Amma bu klubun yetirməsi olduğum üçün qalmağa üstünlük verdim. Bundan sonra necə olacağını demək çətindir. Lakin kimsə komandadan getsə, onu bu qərarına görə günahlandırmaq olmaz.
